उपाशीपोटी झोपलेल्या चिमुकल्यांचा काळाने घेतला घास; मद्यधुंद डंपर चालक ठरला वैरी.

वाघोली येथील केसनंद इथं पोटाची खळगी भरण्यासाठी अमरावतीहून आलेल्या आणि दमून भागून रस्त्याच्या कडेला झोपलेल्या कामगारांना काळ बनून आलेल्या मद्यधुंद डंपर चालकाने अक्षरशः चिरडलं.तुम्ही गरीब असाल, तुमच्या डोक्यावर छत नसेल आणि धरती हे अंथरूण तर आकाश हेच पांघरूण असेल तर तुम्ही किड्या मुंग्यासारखे चिरडून मेलात तरीही त्याचं कुणालाच काही देणंघेणं नाही. असं वाटण्याचं कारण म्हणजे वाघोली येथील अपघातात मृत्यूमुखी पडलेल्या आणि काही जखमी अवस्थेत असलेल्या मजुरांची परिस्थिती.
वाघोली येथील केसनंद इथं पोटाची खळगी भरण्यासाठी अमरावतीहून आलेल्या आणि दमून भागून रस्त्याच्या कडेला झोपलेल्या कामगारांना काळ बनून आलेल्या मद्यधुंद डंपर चालकाने अक्षरशः चिरडलं. यात दोन चिमुकल्यांसह तिघांनी उपाशीपोटीच जगाचा निरोप घेतला तर अजूनही सहाजणांची मृत्यूशी झुंज सुरु आहे. अंगावर काटा आणणाऱ्या या घटना का थांबत नाहीत? की गरिबांना जगण्याचा अधिकारच नाही का? दोन वेळचं पोटभर अन्नही नशिबात नसणाऱ्या, मोलमजुरी करून उदरनिर्वाह करणाऱ्या त्या आपघातग्रस्त मजुरांना समाज आणि सरकारकडून मदत आणि न्याय मिळणार का? असे अनेक प्रश्न सकाळी सकाळी हाती आलेल्या मन सुन्न करणाऱ्या या बातमीने निर्माण केले आहेत

या घटनेमुळे मृतांच्या कुटुंबियांमध्ये आक्रोश पसरला आहे. या घटनेमध्ये नेमकी चुक कोणाची हा सवाल आता उपस्थित झाला आहे. आपलं घरदार सोडून पोटापाण्यासाठी शहरात आलेल्या गरिब मजुरांची जे दिवसभर कष्ट करुन दमुन-भागून रस्त्याच्या कडेला झोपले होते. की, मद्यधुंद अवस्थेत असलेल्या डंपर चालकाची जो उन्मत वाहन चालवत होता त्याची? या प्रश्नाचं उत्तर बहुधा आपल्या सगळ्यांनाच माहीत आहे. परंतु ही वेळ फक्त प्रश्नांची ऊकल करण्याची नसून समाज म्हणून आपली आणि जबाबदारी म्हणून सरकारने पीडीतांना मदत करण्याची आहे.
ज्या रोजगारासाठी हे कामगार पुण्यात आले होते तो रोजगार त्यांना अमरावतीतच उपलब्ध झाला असता तर कदाचित आजची ही दुर्घटना घडली नसती.यातील मृतांना भावपूर्ण श्रद्धांजली आणि जखमी झालेले कामगार लवकर बरे व्हावेत, ही प्रार्थना! सरकारने या प्रकरणाची दखल घेऊन लवकरात लवकर कारवाई करावी आणि पिडीत कुटुंबांना योग्य भरपाई द्यावी ही विनंती.