माझ्या मुलाचे तुकडे करून देऊ नका…वडिलांचा आक्रोश, चिन्नास्वामी स्टेडियमबाहेरील चेंगराचेंगरीत गमावला मुलगा.

 बेंगळुरूच्या चिन्नास्वामी स्टेडियममध्ये आरसीबीच्या विजयाचा जल्लोषा साजरा केला जात होता. विराट कोहली आणि आरसीबीच्या टीमला बघण्यासाठी चाहत्यांनी मोठी गर्दी केली. ही गर्दी इतकी जास्त वाढली की, पोलिसांना गर्दी नियंत्रित करण्यासाठी लाठीचार्ज करावा लागला. या लाठीचार्जनंतर चेंगराचेंगरीत ११ जणांचा मृत्यू झाला. सुरक्षा रक्षकांनी गर्दी रोखण्याचा प्रयत्न केला, परंतु त्यांना प्रचंड गर्दीसमोर मार्ग सोडावा लागला.

या चेंगराचेंगरीचे अनेक फोटो आणि व्हिडीओ हे सोशल मीडियावर व्हायरल होत आहेत. चिन्नास्वामी स्टेडियमसमोर आता चप्पलांचा ढिगारा पसरला आहे.हैराण करणारी घटना म्हणजे बाहेर चेंगराचेंगरी झालेली असताना देखील स्टेडियमच्यामध्ये जय्यत कार्यक्रम सुरू होता. या चेंगराचेंगरीमध्ये १ जणांचा मृत्यू झाला तर ३० जण गंभीर जखमी झाली आहेत. सध्या जखमींवर उपचार सुरू असून सरकारकडून मोफत उपचार केली जाणार असल्याचे मुख्यमंत्र्यांनी कालच जाहीर केले. आरसीबी संघाच्या परेडचेही आयोजन करण्यात आले होते. मात्र, त्यानंतर रद्द करण्याचा निर्णय प्रशासनाने घेतला.चिन्नास्वामी स्टेडियमबाहेर झालेल्या चेंगराचेंगरीमध्ये आपला मुलगा गमावलेल्या वडिलांनी मोठी मागणी करत म्हटले की, माझ्या मुलाचे शवविच्छेदन न करता आम्हाला द्या…त्याचा मृतदेह परत द्या…हे बोलताना वडिलांच्या डोळ्यातील अश्रू थांबत नव्हते. ते पुढे म्हणाले की, माझा एकच मुलगा होता, जो आता राहिला नाहीये. त्याच्या शरीराचे तुकडे तुकडे करून आम्हाला देऊ नका…त्याचा आहे तसा मृतदेह परत द्या…तरूणाचे वडील हे अधिकाऱ्यांना शवविच्छेदन न करता मुलाचा मृतदेह द्या अशी विनंती करत होते. मुलाच्या वडिलांनी हे देखील म्हटले की, तो त्यांना न सांगता चिन्नास्वामी स्टेडियमबाहेर पोहोचला होता. पण आता काहीच शिल्लक राहिले नाही. किमान आम्हाला त्याचे अंत्यसंस्कार तरी करून द्या असे वडील म्हणत होते. चिन्नास्वामी स्टेडियमबाहेर झालेल्या या चेंगराचेंगरीमध्ये ११ जणांचा जीव गेला असून कुटुंबियांवर दु:खाचा डोंगर कोसळला आहे.