बँक अधिकारी असल्याचं भासवलं, हगवणे मायलेकानेच माणसं पाठवून JCB उचलला, नवा कारनामा समोर.

वैष्णवी हगवणे मृत्यू प्रकरणात अटकेत असलेल्या हगवणे कुटुंबीयांच्या काळा करनाम्यांची यादी दिवसेंदिवस वाढतच आहे. वैष्णवीचा पती शशांक हगवणे आणि सासू लता हगवणे यांच्या फसवेगिरीचा आणखी एक अंक आता पुढे आला आहे. प्रशांत येळवंडेकडून जेसीबी जप्त करण्यापासून ते स्वतःकडे ताबा घेण्यापर्यंत हगवणे माय-लेकानेच कट रचल्याचं आता पोलीस तपासात समोर आलं आहे. कारण थकीत कर्ज असलेला जेसीबी आम्ही येळवंडेकडून जप्त केलाच नाही, असा खुलासा इंडसइंड बँकेने केला आहे.लता आणि शशांक हगवणे यांनी प्रशांत येळवंडे नामक व्यक्तीला जेसीबीची विक्री केली होती. हा जेसीबी मुळात इंडसइंड बँकेकडून हफ्त्याने घेण्यात आला होता. त्याचे हफ्ते सुरू असतानाच हगवणे कुटुंबीयांनी येळवंडे यांना जेसीबीची विक्री केली. यासाठी त्यांनी येळवंडेकडून 11 लाख 70 हजार घेतले.

मात्र मुळात त्यांनी बँकेचं लोन फेडलं नाही. यानंतर काही दिवसांनी बँकेने हा जेसीबी जप्त केला.शशांक हगवणे यांनी पैसे देण्याचं कबुल केलं, मात्र प्रत्यक्षात पैसे दिले नसल्याचा आरोप येळवंडेंकडून केला जात आहे. बँकेने जप्ती आणलेला जेसीबी काही दिवसांनी शशांक हगवणेंच्या घराजवळ आढळल्याने अनेक सवाल उपस्थित झाले होते. त्यामुळे प्रशांत येळवंडे यांनी हगवणेकडून खरेदी केलेला जेसीबी नेमका कोणी जप्त केला? जप्ती आणलेला जेसीबी गोडाऊनमधून जप्त कसा झाला? यासंदर्भात बँकेची चौकशी करण्यात आली. त्यावेळेस हा सगळा कट हगवणे माय-लेकाचाच होता हे उघड झालं आहे.

जप्त केलेला जेसीबी ज्यांच्या गोडाऊनमध्ये ठेवला त्या रणजित आणि भूषण खांडेभराड यांनी देखील आता हगवणेंनी केलेल्या फसवणुकीचे कारनामे उघडे केले आहेत. येळवंडेकडून जप्त करण्यात आलेला जेसीबी हा आमच्या गोडाऊनपर्यंत पोहचलाच नाही, अशी धक्कादायक माहिती खांडेभराड यांनी पोलीस चौकशीत दिली आहे.येळवंडेकडून जेसीबी जप्त करणारे लोक हे हगवणेची माणसं होती हे जवळपास स्पष्ट झालं आहे. त्यामुळे हा देखील हगवणेच्या कटाचा आणि दादागिरीचा एक भाग असल्याचं समोर आलं आहे.