कुणाल कामरा प्रकरणात ठाकरे गटाच्या नेत्या सुषमा अंधारेंच्या अडचणी वाढणार, नेमकं काय कारण?

उपमुख्यमंत्री एकनाथ शिंदे यांच्यावरील विडंबन गीतामुळे, स्टॅण्डअप कॉमेडिअन कुणाल कामरा आणि शिवसेनेच्या सुषमा अंधारे यांच्या अडचणीत वाढ होण्याची शक्यता आहे. विधिमंडळाच्या दोन्ही सभागृहांत हक्कभंगाचा प्रस्ताव स्वीकारण्यात आला आहे. समितीने या दोघांना स्पष्टीकरण देण्यासाठी दोन दिवसांची मुदत दिली आहे. या घटनेमुळे राजकारणात पडसाद उमटत आहेत.उपमुख्यमंत्री एकनाथ शिंदे यांच्याबद्दलच्या विडंबन गीताप्रकरणी, स्टॅण्डअप कॉमेडिअन कुणाल कामरा आणि गाण्याचे समर्थन करणाऱ्या शिवसेने उबाठा पक्षाच्या उपनेत्या सुषमा अंधारे यांच्या अडचणीत वाढ होण्याची शक्यता आहे. याप्रकरणी विधिमंडळाच्या दोन्ही सभागृहांत दाखल हक्कभंग प्रस्ताव शुक्रवारी विशेषाधिकार समितीने स्वीकारला. समितीने या दोघांना स्पष्टीकरण देण्यासाठी दोन दिवसांची मुदत दिली आहे.

उपमुख्यमंत्री शिंदे यांच्याबाबत कुणाल कामरा याच्या विडंबनगीताचे पडसाद राजकारणात उमटत आहेत. शिवसेना उपनेत्या सुषमा अंधारे यांनी कामरा यांचे समर्थन केले होते. याचे पडसाद मुंबईत नुकत्याच झालेल्या विधिमंडळाच्या अर्थसंकल्पीय अधिवेशनातही उमटले. विधान परिषदेत भाजप आमदार प्रवीण दरेकर यांनी, तर विधानसभेत शिवसेना आमदार रमेश बोरनारे यांनी कामरा आणि अंधारे यांच्याविरोधात हक्कभंग दाखल करण्याचा प्रस्ताव मांडला होता. हा हक्कभंगाचा प्रस्ताव विशेषाधिकार समितीकडे पाठविण्यात आला असून विशेषाधिकार समितीने शुक्रवारी हा हक्कभंग स्वीकारला.समितीने कामरा आणि अंधारे यांना स्वतःची बाजू मांडण्यासाठी दोन दिवसांची नोटीस बजावली आहे. सभागृहाबाहेरील व्यक्ती असेल, तर समज देऊन सोडून देण्यापासून तुरुंगवास ठोठावण्यापर्यंत कोणतीही शिक्षा होऊ शकते. त्यामुळे कामरा आणि अंधारे यांना कोणती शिक्षा होणार, याकडे लक्ष लागले आहे. कुणाल कामराने नया भारत नावाचा व्हिडीओ अपलोड केला होता, त्यामध्ये त्याने अप्रत्यक्षपणे कोणत्याही नेत्याचे नाव न घेता टीका केली होती. या व्हिडीओर एकनाथ शिंदे यांच्या पक्षाने आक्षेप घेतला आणि कारवाई करण्याची मागणी केली आहे.कुणाल कामरा हा प्रसिद्ध स्टँडअप कॉमेडियन म्हणून ओळखला जातो. २०१७ साली कुणाल कामराने रमित वर्मासोबत Shut UP Ya Kunal हे युट्यूब पॉडकास्ट सुरू केलं होतं. यामध्ये कुणाल कामरा हा समाजिक कार्यकर्ते, राजकीय व्यक्ती आणि इतर क्षेत्रातील व्यक्तींसोबत त्याच्या स्टाईलमध्ये पॉडकास्ट करतो. यामध्ये त्याने अरविंद केजरीवाल, मिलिंद देवरा, सचिन पायलट, कन्हैया कुमार, जावेद अख्तर आणि पत्रकार रवीश कुमार होते. महाविकास आघाडी सरकार असताना कुणाल कामराने ठाकरे गटाचे नेते संजय राऊत यांच्यासोबत पॉडकास्ट केले होते.