इमारती पत्त्यांच्या बंगल्यासारख्या कोसळल्या, लोकांची पळापळ; म्यानमार, थायलंडमध्ये भूकंप.

 म्यानमार, थायलंड, बांग्लादेशात भूकंपाचे तीव्र झटके जाणवले आहेत. या भूकंपाची तीव्रता ७.७ रिश्टर स्केल इतकी आहे. भूकंपामुळे अनेक इमारती जमीनदोस्त झाल्या आहेत. थायलंडची राजधानी बँकॉकमधून एक व्हिडीओ समोर आला आहे.बँकॉक: म्यानमार, थायलंड, बांग्लादेशात भूकंपाचे तीव्र झटके जाणवले आहेत. या भूकंपाची तीव्रता ७.७ रिश्टर स्केल इतकी आहे. भूकंपामुळे अनेक इमारती जमीनदोस्त झाल्या आहेत. थायलंडची राजधानी बँकॉकमधून एक व्हिडीओ समोर आला आहे. त्यात एक बहुमजली इमारत पत्त्यांच्या बंगल्यासारखी कोसळताना दिसत आहे. भूकंपाचे धक्के दिल्ली एनसीआरपर्यंत जाणवले. भूकंपाचा केंद्रबिंदू जमिनीत केवळ १० किलोमीटर खोलवर असल्यानं नुकसानाची तीव्रता वाढली. बँकॉकमध्ये आणीबाणी लागू करण्यात आली आहे.

यूएसजीएसनं दिलेल्या माहितीनुसार, स्थानिक वेळेनुसार दुपारी १२.५० वाजता म्यानमारच्या सागाइंग शहराच्या वायव्येला १६ किलोमीटर दूरवर जमिनीच्या १० किलोमीटर खाली भूकंप झाला. बँकॉकमध्ये भूकंपानं मोठं नुकसान झालं आहे. भूकंपाचे अनेक फोटो, व्हिडीओ समोर आले आहेत. त्यात अनेक नागरिक त्यांच्या घरातून बाहेर पळताना, रस्त्यावर सैरावैरा धावताना दिसत आहेत. भूकंपाच्या धक्क्यानं अनेक इमारती कोसळल्या. थायलंडची राजधानी बँकॉकमध्ये बहुमजली इमारत अवघ्या काही क्षणांमध्ये जमीनदोस्त झाली.भूकंपामुळे म्यानमार आणि थायलंडमध्ये प्रचंड नुकसान झालं आहे. म्यानमारमध्ये एक तीन मजली इमारत कोसळत असतानाचा व्हिडीओ समोर आला आहे. भूकंपाचे झटके जाणवल्यानं घाबरलेले लोक रस्त्यावर उतरले आहेत. जीव वाचवण्यासाठी नागरिकांची धावपळ सुरु आहे. बँकॉकमध्ये निर्माणाधीन इमारत कोसळली. त्यानंतर कामगार पळू लागले.म्यानमारमधील सागाइंगमध्ये भूकंपाचा केंद्रबिंदू होता. भूकंपाच्या धक्क्यानं म्यानमारच्या इरावडी नदीवर जगप्रसिद्ध एवा पूल कोसळला. चीन आणि तैवानच्या काही भागांमध्येही भूकंपाचे झटके जाणवले. भूकंपामुळे संपूर्ण बँकॉकमध्ये लॉकडाऊन लावण्यात आला आहे. शेअर बाजारातील व्यवहार थांबले आहेत. विमानतळ आणि बोगदे बंद करण्यात आले आहेत.थायलंडमध्ये भूकंपामुळे एका व्यक्तीचा मृत्यू झाले असून ५० जण बेपत्ता आहेत. बँकॉकमध्ये निर्माणाधीन इमारत कोसळल्यानंतर अनेक जण इमारतीखाली अडकले आहेत. म्यानमारमध्ये मांडलेय शहरात भूकंपामुळे सर्वाधिक नुकसान झालं आहे. शहरातील अनेक मंदिरं आणि बौद्ध स्थळांची मोठी हानी झाली आहे. बांग्लादेशची राजधानी ढाक्यासह चटगाव आणि अन्य शहरातही भूकंपामुळे मोठं नुकसान झालं आहे.