बारामतीसाठी 1 हजार कोटी रुपये आणले, ‘मलिदा’ गॅंगने मला तर नको नको केलं, कारण… दादांनी टोचले ठेकेदारांचे कान.

उपमुख्यमंत्री अजित पवार यांनी बारामतीतील शेतकरी मेळाव्यात हजेरी लावली. त्यांनी ठेकेदार व पुढाऱ्यांना कामाचा दर्जा राखण्याचे महत्त्व सांगितले. पवारांनी बारामतीसाठी 1000 कोटी रुपयांचे काम मंजूर केल्याचे सांगितले. त्यांनी प्रशासनावर दरारा ठेवून कष्ट करून काम करण्याचे आवाहन केले. पवारांनी संस्थांना चुकीचा डाग लागू देणार नाही असा विश्वास दिला.”मलिदा” गॅंगने मला तर नको नको केलं आहे, तरी त्यांना हौस आहेच. मी शंभरदा सांगितलं, एक तर पुढारपण करा किंवा कॉन्ट्रॅक्टर बना. तुम्ही पुढारी बनणार, माझ्याकडून कामे घेणार आणि कामाचा दर्जा नाही राहिला तर मी पुन्हा अडचणीत येणार. लोकं म्हणतील अजित पवारांना हे दिसत नाही का? या शब्दात उपमुख्यमंत्री अजित पवार यांनी पुढाऱ्यांसह ठेकेदारांचे कान टोचले. उपमुख्यमंत्री अजित पवार शुक्रवारी बारामती दौऱ्यावर होते.

 

बारामती तालुक्यातील माळेगाव येथील शिवतीर्थ मंगल कार्यालयात शेतकरी मेळाव्याचे आयोजन करण्यात आले होते. यावेळी पवार बोलत होते.मी तुमची विकासाची कामे करण्यासाठी निवडून गेलो आहे. विकासामध्ये जर मी कुठे कमी पडलो. तर जाब विचारा. 100 दिवस झाले. राज्यात असा कोणता तालुका आहे. शंभर दिवसांच्या आत 1 हजार कोटी रुपये बारामती करिता मंजूर केले. जानाई शिरसाई बंद पाईपलाईन योजनेसाठी 460 कोटी रुपये, पशुवैद्यकीय महाविद्यालयासाठी 560 कोटी रुपये, असे जवळपास 1 हजार कोटी रुपये बारामतीसाठी आणले. कधी झालं होतं का याआधी, असेही पवार यावेळी म्हणाले.मी बाकीच्यांसारखं कुठे भेटायला गेलो की फोटो काढायचा. कुणाला नमस्कार केला की त्याचा फोटो काढायचा आणि ते सगळीकडे दाखवायचं, असं म्हणत फोटो काढून प्रश्न सुटत नाहीत. त्यासाठी काम करावं लागतं कष्ट करावे लागतं. प्रशासनावर दरारा असावा लागतो. आपण जे काम सांगतो त्या कामाचे ज्ञान स्वतःला असायला पाहिजे. तेव्हा काम होतं, असं म्हणत विरोधकांवर अजित पवारांनी निशाणा लगावला.तुम्ही आम्ही आज असू उद्या नसू, संस्था मात्र कायम राहणार आहेत. जोपर्यंत माझ्या जीवात जीव आहे. तोपर्यंत संस्थेला टीचभर ही चुकीचा डाग लागू देणार नाही. हा माझा शब्द आहे. जेव्हा मला जमणार नाही त्यावेळेस मी सभा घेईन. आणि त्यात सांगेल, मला यापुढे जमणार नाही, असंही पवार यावेळी म्हणाले.