दोन गुण कमी पडले अन् आर्मीत भरती होण्याची संधी हुकली, तरुणाने नको तेच केलं, अख्खं धुळे सुन्न.

धुळ्यात एका तरुणाने आपल्या आयुष्याची अखेर केली आहे. या तरुणाला आर्मीत भरती व्हायचं होतं, पण अवघ्या दोन गुणांनी त्याची संधी हुकली. त्यातून तो नैराश्यात गेला आणि त्याने हे टोकाचं पाऊल उचललं.भारतीय लष्करात भरती होऊन देशाची सेवा करावी, हे स्वप्न डोळ्यात घेत एका तरुणाने भरतीसाठी परीक्षा दिली. त्याला भारतीय लष्करात भरती व्हायचं होतं. मात्र, या परीक्षेत अवघ्य दोन गुणांनी त्याची हे स्वप्न पूर्ण करण्याची संधी हुकली. धुळे तालुक्यातील रामी येथील उच्च शिक्षित तरुण या परीक्षेत अवघ्या दोन गुणांनी मागे पडला. यामुळे त्याला इतकं नैराश्य आलं की त्याने गळफास घेत आपल्या आयुष्याची अखेर केली आहे.

या घटनेने संपूर्ण धुळ्यात एकच खळबळ माजली आहे.अक्षय यशवंत माळी (वय २१) असे या तरुणाचे नाव असून या घटनेमुळे गावात एकच हळहळ व्यक्त होत आहे. जिल्हा पोलीस अधीक्षक श्रीकांत धिवरे यांनी माळी कुटुंबाची भेट घेऊन सांत्वन केले आहे.अक्षय माळी हा शेतकरी असलेल्या यशवंत माळी यांचा मुलगा आहे. त्याने २५ मार्चला पहाटे ५.३० वाजताच्या सुमारास रामी गावालगत मोडळ नदी परिसरातील शेतात दोरीच्या सहाय्याने त्याने गळफास घेत आपली जीवनयात्रा संपवली. ही बाब लक्षात येताच कुटुंबीयांनी त्याला उपचारासाठी हिरे वैद्यकीय महाविद्यालयात दाखल केले. येथे डॉ. विद्या गायकवाड यांनी तपासणी करीत त्याला मृत घोषित केले. याबाबत सोनगीर पोलीस ठाण्यात अकस्मात मृत्यूची नोंद करण्यात आली आहे.अक्षय माळी हा उच्च शिक्षित तरुण होता. त्याने बीएस्सीचं शिक्षण पूर्ण केलं होतं. कुटुंबाची परिस्थिती जेमतेम असतानाही त्याने परिस्थितीवर मात करत आपलं शिक्षण पूर्ण केलं आणि भारतीय लष्करात भरती होऊन देशसेवेचं स्वप्न पाहिलं होतं. त्याच्या अशा अचानक जाण्याने त्याच्या कुटुंबीयांवर दु:खाचा डोंगर कोसळला आहे. या घटनेने यशवंत माळी यांना मोठा धक्का बसला आहे. आपल्या म्हातारपणातील आधार असलेला आपला लेक असा अचानक जगातून निघून गेल्याने ते शोकसागरात बुडाले आहेत.