इकडे आसाराम तुरुंगात, तिकडे आश्रमात ‘खेळ’ होणार; जग डोळे विस्फारुन पाहणार, सरकारचा प्लान काय?

बलात्कार प्रकरणात दोषी आढळलेला आसाराम अनेक महिन्यांपासून तुरुंगात आहे. अहमदाबादच्या मोतारामध्ये असलेला आसारामचा आश्रम अचानक चर्चेत आला आहे. गुजरात सरकारनं २०३६ च्या ऑलिम्पिकसाठी एक मास्टर प्लान तयार केला आहे.अहमदाबाद: बलात्कार प्रकरणात दोषी आढळलेला आसाराम अनेक महिन्यांपासून तुरुंगात आहे. अहमदाबादच्या मोतारामध्ये असलेला आसारामचा आश्रम अचानक चर्चेत आला आहे. गुजरात सरकारनं २०३६ च्या ऑलिम्पिकसाठी एक मास्टर प्लान तयार केला आहे. त्यानुसार आसारामच्या आश्रमाच्या जमिनीवर सरदार वल्लभभाई पटेल स्पोर्ट्स एन्क्लेव्ह आणि ऑलिम्पिक व्हिलेज उभारण्याची सरकारची योजना आहे. नरेंद्र मोदी स्टेडियमच्या जवळ ६५० एकरवर ऑलिम्पिक व्हिलेज तयार करण्यात येणार आहे. यासाठी आसारामच्या अन्य दोन आश्रमांच्या जमिनीदेखील अधिग्रहित केल्या जाणार आहेत. या संपूर्ण योजनेमुळे अहमदाबादचं रुपडं पालटणार आहे.
आसाराम २०१८ पासून बलात्कार प्रकरणात तुरुंगात आहे. त्याला आजन्म कारावासाची शिक्षा झाली आहे. पण आता त्याच्या आश्रमावर सरकारचं लक्ष गेलं आहे. आसारामच्या आश्रमाची जमीन सरदार वल्लभभाई पटेल (एसव्हीपी) स्पोर्ट्स एन्क्लेव्हसाठी अधिग्रहित केली जाणार आहे. यासोबतच भारतीय सेवा समाज आणि सदाशिव प्रज्ञा मंडल नावाच्या दोन आश्रमांच्या जमिनीदेखील याच मास्टर प्लानचा भाग असणार आहेत.

जमीन अधिग्रहणची प्रक्रिया अहमदाबाद नगर परिषदेचे आयुक्त, अहमदाबाद जिल्हाधिकारी आणि अहमदाबाद शहर विकास क्षेत्र विकास प्राधिकरणचे (एयूडीए) सीईओ यांचा समावेश असलेली त्रिसदस्यीय समिती पाहत आहे. आसाराम आश्रमाचं पर्यायी जागेवर स्थानांतरण करण्याची योजना आहे. ट्रस्टला नवी जमीन द्यायची की त्यांना सध्याच्या वास्तूंच्या बदल्यात नुकसान भरपाई द्यायची, याचा निर्णय जमीन अधिग्रहण समिती घेणार आहे. एयूडीएमधील सुत्रांनी दिलेल्या माहितीनुसार, आश्रमासाठी पर्यायी जागांचा मुद्दा विचाराधीन आहे.आसाराम गेल्या दशकभरापासून वादात राहिला आहे. एका अल्पवयीन मुलीवर बलात्कार केल्याप्रकरणी २०१३ मध्ये त्याला अटक करण्यात आली. २०१८ मध्ये जोधपूरमधील एका न्यायालयानं त्याला आजन्म कारावासाची शिक्षा सुनावली. त्यानंतरही त्याचे अनुयायी सक्रिय आहेत. मोतारामधील आश्रम त्यांच्यासाठी महत्त्वाचा आहे. या आश्रमाता अनेक धार्मिक कार्यक्रम घेतले जातात. पण आता या आश्रमाच्या जमिनीचा वापर ऑलिम्पिकसाठी होणार आहे.सरकारच्या निर्णयामुळे आसारामचे अनुयायी नाराज होण्याची शक्यता आहे. कारण त्यांच्यासाठी आश्रम पवित्र ठिकाण आहे. सोशल मीडियावर काहींनी सरकारच्या निर्णयावर टीका केली आहे. आसाराम तुरुंगात असताना त्याच्या आश्रमाकडे वाकड्या नजरेनं पाहण्याची सरकारची हिंमत कशी झाली, असा सवाल एकानं एक्स या सोशल मीडिया प्लॅटफॉर्मवर विचारला. काहींनी सरकारच्या निर्णयाला पाठिंबाही दर्शवला. आसाराम गुन्हेगार आहे आणि त्याचा आश्रम आता ऑलिम्पिकसारख्या स्पर्धेसाठी कामी येत असल्यास सरकारच्या निर्णयाचं स्वागत, अशा आशयाच्या पोस्टही पाहायला मिळत आहेत.