मुलीची छेड काढण्यावरुन वडिलांनी खडसावलं, तरुणाने भर चौकात पित्याला संपवलं, परिसरात खळबळ.

मुलीची छेड काढणाऱ्या तरुणाला पित्याने खडसावलं, आरोपीने भर चौकातच पित्याची हत्या केल्याची खळबळजनक घटना समोर आली आहे. या घटनेने परिसरात भीतीचे वातावरण पसरले आहे.नागपुरात हत्येच्या घटनेने खळबळ उडाली आहे. इमामवाडा पोलीस ठाण्याच्या हद्दीतील जाटतरोडी परिसरात बुधवारी दुपारी एका व्यक्तीची भरदिवसा धारदार शस्त्राने वार करून निर्घृण हत्या करण्यात आली. या घटनेने संपूर्ण परिसरात खळबळ उडाली असून नागरिकांमध्ये प्रचंड संताप व्यक्त केला जात आहे. पोलिसांनी हत्येअंतर्गत गुन्हा दाखल केला असून आरोपींचा शोध सुरू आहे.हत्येची घटना बुधवारी दुपारी इमामवाडा पोलीस ठाण्याच्या जाटतरोडी पोलीस चौकीसमोर घडली. ५३ वर्षीय नरेश वालदे असे मृतकाचे नाव असून ते पेंटिंगचे काम करत होते आणि ते आपल्या कुटुंबासह राहत होता. तो आपल्या लकवाग्रस्त झालेल्या आईचीही काळजी घेत असल्याचे सांगितले जात आहे.

व्यक्तीच्या मृत्यूनंतर त्यांच्या पश्चात पत्नी आणि तीन मुली असा परिवार आहे.मिळालेल्या माहितीनुसार, बुधवारी दुपारी नरेश यांना काही अज्ञात व्यक्तीने भेटण्यासाठी बोलावले होते. ते दुचाकीवरून जाटतरोडी पोलीस चौकीजवळ आले असता मोपेडवरून आलेल्या दोन हल्लेखोरांनी चौकाच्या मधोमध नरेश यांच्यावर खंजीरने हल्ला करून घटनास्थळावरून पळ काढला.नितेश उर्फ नाना मेश्राम आणि ईश्वर उर्फ जॅकी सोनकुवर अशी आरोपींची नावे असून त्यांचा पूर्वीपासून गुन्हेगारी इतिहास आहे. मृतकाच्या कुटुंबीयांनी दिलेल्या माहितीनुसार, नाना मेश्राम गेल्या चार वर्षांपासून नरेश यांच्या मुलीची छेळ काढत होता आणि तिला त्रास देत होता.

नरेश यांनी मुलीची छेड काढण्यावरुन त्याला विरोध केला. तसंच अनेकदा आरोपीला समजावण्याचा प्रयत्नही केला होता. मात्र आरोपींनी त्याला जीवे मारण्याची धमकी दिली होती.हत्येच्या एक दिवस आधी रात्री काही अज्ञातांनी नरेश यांच्या घरावर दगडफेक केली होती, त्याबाबतची फिर्याद इमामवाडा पोलीस ठाण्यात दाखल करण्यात आली होती, मात्र आरोपीवर कोणतीही कारवाई करण्यात आली नव्हती. या निर्घृण हत्येनंतर आता पोलीस कारवाईत आले असून आरोपींविरुद्ध हत्येचा गुन्हा दाखल करून त्यांचा शोध सुरू केला आहे. या घटनेनंतर परिसरात प्रचंड तणावाचे वातावरण असून कायदा आणि सुव्यवस्थेवर स्थानिक नागरिक प्रश्न उपस्थित करत आहेत.