‘लिव्ह इन’मध्ये राहणाऱ्या जोडप्याला मारहाण; मध्यरात्री घरात घुसले आणि… बारामतीतील भयंकर घटना.

बारामतीमध्ये जोडप्याला मध्यरात्री घरात मारहाण करण्यात आल्याची धक्कादायक घटना घडली आहे. जोडप्याला कुऱ्हाडी, लाकडी दांड्याने मारहाण करण्यात आली आहे.’लिव्ह इन रिलेशनशीप’मध्ये राहणाऱ्या ४८ वर्षीय महिलेला तिच्या पुतण्याने दोघांच्या मदतीने बेदम मारहाण केली. यात तिच्यासोबत राहणारा ३२ वर्षीय युवकही गंभीर जखमी झाला. महिलेवर सोमेश्वरनगरमधील एका खासगी रुग्णालयात उपचार सुरु आहेत. विशेष म्हणजे या कटात या महिलेच्या मुलाने व सूनेनेही आरोपींना साथ दिली. जखमी महिलेने दिलेल्या फिर्यादीवरून वडगाव निंबाळकर पोलिसांनी पुतण्यासह दोघा अनोळखींविरोधात गुन्हा दाखल केला.

माळशिरस तालुक्यातील पिंपरे येथील ही महिला सदोबाचीवाडी येथे राहते. गेल्या आठ वर्षांपासून ती गावातील एका तरुणासोबत लिव्ह इन रिलेशनशीपमध्ये आहे. तो तिच्याच घरात राहतो. १८ मार्च रोजी तिचा पुतण्या तिला भेटण्यासाठी गावाकडून आला होता. रात्री जेवणखाण झाल्यानंतर घरात फिर्यादी झोपली. तिच्यासोबत राहणारा तरुण रात्री कामावरून परत येऊन किचनमध्ये जावून झोपला.रात्री अडीचच्या सुमारास तिच्या पुतण्याने दोघा अनोळखी व्यक्तींना घरात बोलावले. ते हातामध्ये कुऱ्हाड, लाकडी दांडके घेवून आले.

फिर्यादी चुलतीला पुतण्याने तु लिव्ह इनमध्ये का राहते, तुझ्या अशा वागण्याने समाजात आमची अब्रू जाते असे सांगत त्याच्या हातातील कुऱ्हाड फिर्यादीच्या डोक्यात मारली.दोघा अनोळखींकडून दांडक्याने मारहाण करण्यात आली. तिच्या घरातील किचनमध्ये झोपलेल्या तरुणालाही कुऱ्हाडीने मारहाण करण्यात आली. त्यात जो जखमी झाला. डोक्यातून रक्त येऊ लागल्यानंतर या दोघांनी जोराचा आरडाओरडा केला. त्यामुळे आजूबाजूचे लोक जमा होतील या भीतीपोटी हे तिघे हत्यारे टाकून पळून गेले. दरम्यान या महिलेची सून आणि मुलगा घराबाहेरच्या खिडकीतून मारहाणीचा हा प्रकार पाहत होते. त्यांच्याच साथीने हा प्रकार घडला असावा अशी शक्यता फिर्यादीत व्यक्त करण्यात आली.