बायकोचं अफेअर पकडलं, नवऱ्याने योग शिक्षकाला सात फूट खड्ड्यात जिवंत पुरलं, तीन महिन्यांनी…

हरियाणा येथे एका योग शिक्षकाला जिवंत पुरण्यात आलं आहे. धक्कादायक बाब म्हणजे या शिक्षकाला विवाहबाह्य संबंधातून संपवण्यात आल्याचं समोर आलं आहे.गेल्या काही दिवसांपासून प्रेमप्रकरणातून होणाऱ्या हत्यांच्या प्रमाणात वाढ झाली आहे. काहीच दिवसांपूर्वी उत्तर प्रदेशातील मेरठ येथील सौरभ राजपूतची त्याच्या पत्नी आणि प्रियकराकडून हत्या करण्यात आल्याचं समोर आलं होतं. या दोघांनी सौरभची हत्या करुन त्याच्या मृतदेहाचे तुकडे केले. त्यानंतर एका ड्रममध्ये भरुन त्यात सिमेंट टाकलं. या घटनेने संपूर्ण देश हादरुन गेला आहे. आता हरियाणाच्या रोहतकमधून अशीच एक धक्कादायक घटना समोर आली आहे, जिथे प्रेमप्रकरणातून बाबा मस्तनाथ विद्यापीठातील योग शिक्षक जगदीप यांचे अपहरण करून त्यांना ६१ किलोमीटर अंतरावर असलेल्या चरखी दादरीच्या पंतावास गावात जिवंत गाडण्यात आले.

जगदीप हे झज्जर जिल्ह्यातील मंदोठी गावचा रहिवासी होता. तो २४ डिसेंबर रोजी बेपत्ता झाला होता. अपहरणानंतर १० दिवसांनी पोलिसांकडे हरवल्याची तक्रार दाखल करण्यात आली होती, परंतु तीन महिन्यांपर्यंत कोणताही सुगावा लागला नाही. पोलिसांनी कॉल डिटेल्सच्या आधारे तपास सुरू केला आणि अखेरी २४ मार्च रोजी मृतदेह सापडला.पोलिसांच्या तापासात जगदीप हा ज्या घरात भाड्याने राहत होता, तिथेच त्याची एका महिलेशी जवळीक वाढली. पण, ती महिला विवाहित होती. एक दिवस यांच्या प्रेमप्रकरणाची माहिती मिळाली आणि ही भयंकर घटना घडली.या प्रेमप्रकरणाबाबत जेव्हा त्या महिलेच्या पतीला माहिती मिळाली, तेव्हा त्याने आपल्या साथीदारांसह मिळून जगदीपचे अपहरण केले, त्याला बेदम मारहाण केली आणि मग त्याचे हात-पाय बांधून त्याला सात फूट खोल खड्ड्यात जिवंत गाडलं.या हत्येप्रकरणी हरदीप आणि धरमपाल या दोन आरोपींना अटक करण्यात आली असून, इतरांचा शोध सुरू आहे. पोलिस अधिकारी कुलदीप सिंह यांनी दिलेल्या अधिक माहितीनुसार, आरोपींची चौकशी सुरू असून लवकरच संपूर्ण प्रकरण उघड होईल. ही हत्या केवळ प्रेमप्रकरणातून झाली की त्यामागे आणखी काही कारण आहे, असाही प्रश्न उपस्थित होत आहे. या प्रकरणी पोलीस कसून तपास करत आहेत.