पत्नीचा ‘तो’ बनाव फसला; महिलेच्या भयंकर कृत्याने पोलिसही हैराण, काय घडलं.

 पत्नीने पतीची हत्या करुन त्याला फासावर लटकवत पतीने आत्महत्या केल्याचा बनाव रचला. मात्र पोलिसांना संशय आला आणि महिलेचं भयंकर कृत्य समोर आलं. देशभरात हत्येच्या घटनांमध्ये सतत वाढ होत आहे. दररोज कुठे ना कुठे हत्येच्या, मारामारीच्या घटना समोर येत आहेत. अशात अशीच एक भयंकर घटना समोर आली असून या घटनेने पोलिसही हैराण झाले आहेत. पण पोलिसांनी केवळ २४ तासात या घटनेचं गूढ उकललं.एका पत्नीने आपल्या पतीचा गळा दाबून त्याची हत्या केली. त्यानंतर पत्नीने ही घटना आत्महत्या असल्याचा बनाव रचला. महिलेने पतीला फाशी घेतलेल्या अवस्थेत फासावर लटकवलं, जेणेकरुन पतीने आत्महत्या केल्याचं भासवलं जाईल. पण पत्नीचा हा बनाव फसला. झारखंडमधील गिरिडीह या भागात ही घटना घडली आहे.शनिवारी सकाळी मिथलेश कुमार नावाचा तरुण त्याच्या राहत्या घरात लटकलेल्या अवस्थेत आढळला. याबाबत तात्काळ पोलिसांना सूचना देण्यात आली. पोलिसांनी घटनास्थळी दाखल होत, तरुणाचा मृतदेह ताब्यात घेतला आणि तो शवविच्छेदनासाठी रुग्णालयात पाठवला. त्यानंतर पोलीस याप्रकरणी अधिक तपास करत होते.

तपासावेळी पोलीस मृत व्यक्तीच्या पत्नीची कुमकुम देवीची चौकशी करत होते. कुमकुमने पोलिसांना सांगितलं, की तिचा पती नशेच्या आहारी गेलेला होता. तो सतत तणावात असायचा. शुक्रवारी रात्री जेवल्यानंतर तो झोपायला गेला. सकाळी ज्यावेळी त्याच्या खोलीत गेली, त्यावेळी दरवाजा उघडला नाही. बाहेरुन पाहिल्यानंतर पती फासावर लटकलेल्या अवस्थेत आढळला.मृत व्यक्तीच्या पत्नीने अशी माहिती पोलिसांना दिली पण पोलिसांना तिच्यावर संशय आला. त्यानंतर पोलिसांकडून अधिक सखोल तपास सुरू झाला.

त्यांनी आजूबाजूच्या लोकांकडे चौकशी करण्यास सुरुवात केली. पोलिसांना आजूबाजूच्या चौकशीत काही संशयास्पद, धक्कादायक माहिती मिळाली. यानंतर पोलिसांनी पुन्हा महिलेची कसून चौकशी केल्यानंतर तिने तिचा गुन्हा कबूल केला. तिने पतीची आधी हत्या करुन नंतर ही हत्या आत्महत्या असल्याचं भासवण्याचा प्रयत्न केला. पतीला ठार करुन त्याचा मृतदेह फासावर लटकवला, पण हा बनाव फसला. पत्नीने केलेल्या हत्याकांडने पोलिसही हैराण आहेत. पोलिसांनी घटनेच्या केवळ २४ तासांत या हत्येचं गूढ उकललं आणि आरोपी पत्नीला ताब्यात घेतलं आहे.