भयंकर! हळद शिजवताना कुकरचा भीषण स्फोट, चार शेतकरी जखमी, एकाची प्रकृती चिंताजनक.

शेतात हळद शिजवताना अचानक स्फोट झाल्याने चार शेतकरी जखमी झाल्याची घटना आज दुपारी घडली. शेतकऱ्यांवर शासकीय रुग्णालयात उपचार सुरू आहे. यातील एका शेतकऱ्याची प्रकृती चिंताजनक आहे.नांदेडमध्ये एक भीषण दुर्घटना घडली आहे. शेतात हळद शिजवताना कुकरचा अचानक स्फोट होऊन चार शेतकरी जखमी झाले आहेत. मंगळवारी दुपारी जिल्ह्यातील हदगाव तालुक्यातील आष्टी शिवारात ही धक्कदायक घटना घडली. हा स्फोट इतका मोठा होता की कुकरचे काही भाग एक ते दीड किलोमीटर पेक्षाही दुरवर जाऊन पडले होते. घटनेत जखमी झालेल्यांवर शासकीय रुग्णालयात उपचार सुरु आहे. जखमीमध्ये विश्वनाथ इंद्रवाड, दत्ता इंद्रवाड, देविदास खंदारे आणि अन्य एक शेतकऱ्याचा समावेश आहे. त्यातील एका शेतकऱ्याची प्रकृती चिंताजनक आहे.

राज्यात सध्या सर्वत्र हळद काढणीला सुरुवात झाली आहे. त्यात अनेक शेतकरी आपल्या शेतात हळद शिजवण्यात व्यस्त आहेत. हदगाव तालुक्यातील आष्टी येथील शेतकरी बंडू म्हेत्रे यांच्या शेतात सकाळ पासून हळद शिजवण्याचे काम सुरु होते. काही शेतकरी एका मोठ्या कुकरमध्ये हळद शिजवू लागले. दुपारी अडीच वाजेच्या सुमारास कुकरमध्ये हळद शिजवत असताना अचानक कुकरचा भीषण स्फोट झाला. हा स्फोट एव्हढा मोठा होता की कुकरचे काही भाग एक ते दिड किलोमीटर पेक्षाही दुरवर जाऊन पडले. शिवाय संपूर्ण परिसर स्फ़ोटाचा आवाजाने हादरुन गेला होता.कुकरजवळ असणारे चौघे गंभीर जखमी झाले.

यामध्ये दोघांना विश्वनाथ इंद्रवाड, दत्ता इंद्रवाड, देविदास खंदारे फ्रॅक्चर झाले तर इतरांना गंभीर मार लागला. शिवाय त्वचा भाजली. स्फोटाच्या आवाजामुळे नागरिकांनी घटनास्थळी धाव घेतली आणि त्यांनी तात्काळ जखमी शेतकऱ्यांनाआष्टी येथील प्राथमिक उपचार केंद्रात दाखल केले. वैद्यकीय अधिकारी डॉ. गुणवंत कवळे यांनी जखमीवर उपचार केले. विश्वनाथ इंद्रवाड, दत्ता इंद्रवाड, देविदास खंदारे यांना अधिक मार लागल्याने त्यांना नांदेडच्या शासकीय रुग्णालयात दाखल करण्यात आले आहे. यातील एकाची प्रकृती चिंताजनक असल्याची माहिती आहे. दरम्यान या घटनेने हदगाव तालुक्यात खळबळ उडाली आहे. शेतकऱ्यांनी हळद शिजवताना काळजी घेण्याचे आवाहनही स्थानिक नेतृत्वाकडून करण्यात आले आहे.