स्वारगेट अत्याचाराच्या घटनेनंतरही आगाराची सुरक्षा वाऱ्यावर, एजंटचा वावर ते… धक्कादायक वास्तव समोर.

स्वारगेट आगारामध्ये झालेल्या अत्याचारानंतरही पुणे विभागातील आगारात अद्याप सुधारणा झाल्या नाहीत. अपुरी प्रकाश व्यवस्था, बसचे उघडे दरवाजे आणि महिला सुरक्षारक्षकांचं दुर्लक्ष हे विशेषतः दिसून येत आहे. प्रशासन अद्याप गंभीर नसल्याचे जाणवत आहे.स्वारगेट आगारामध्ये तरुणीवर अत्याचार झाल्याच्या घटनेला महिना झाला तरी फक्त घोषणांशिवाय पुणे विभागातील आगारात काहीही सुधारणा झाल्या नसल्याचे चित्र आहे. अपुरी प्रकाश व्यवस्था, बसचे उघडे राहणारे दरवाजे, महिला सुरक्षारक्षक नेमणुकीकडे दुर्लक्ष अशी पुणे विभागातील आगारांची स्थिती आहे. त्यामुळे परिवहन राज्यमंत्र्यांच्या मतदारसंघात घटना घडूनदेखील यंत्रणा गंभीर नसल्याचे दिसत आहे.
गावी निघालेल्या तरुणीवर स्वारगेट आगारातील शिवशाही बसमध्ये बलात्काराची घटना गेल्या महिन्यात घडली होती. त्यानंतर सर्व मंत्र्यांनी स्वारगेट आगाराला भेट दिली. परिवहनमंत्र्यांनी बैठका घेऊन विविध उपाययोजना करण्यात येत असल्याच्या घोषणा केल्या. पुणे विभागातील सर्व आगारांचे ‘सुरक्षा ऑडिट’ करून त्याचा अहवाल मुख्य कार्यालयास सादर करण्यात आला.

या घटनेत दोषी आढळून आलेल्या तिघांचे निलंबन केले, तर वरिष्ठांच्या तडकाफडकी बदल्या केल्या. मात्र, प्रत्यक्ष सुरक्षारक्षक वाढविण्याशिवाय काहीही घडले नसल्याचे एका महिन्यानंतर दिसून आले. शिवाजीनगर आगारात पहाटे गर्दीच्या वेळी पोलिसांची गस्त दिसली नाही. स्वारगेट आगारात सातारा फलाटावर अपुरी प्रकाश व्यवस्था शिवाजीनगर आगारात शिरून प्रवासी घेऊन जाताना एजंट दिसले. शिवाजीनगर आगारात सुरक्षारक्षक फिरताना आढळले नाहीत. शिवशाही व इतर बसचे दरवाजे उघडे असल्याचे आढळले पुणे स्टेशन येथेही अपुरी प्रकाश व्यवस्था आढळली. पुणे स्टेशन व इतर आगारात दुचाकीस्वार आतमध्ये फिरत होते. प्रत्येक आगारात रात्रीच्या वेळी अनेक जण आगारात झोपल्याचे दिसले पुणे विभागातील स्वारगेट, शिवाजीनगर, वल्लभनगर आणि पुणे स्टेशन या चार आगारांची ‘महाराष्ट्र टाइम्स’च्या प्रतिनिधींनी सोमवारी पहाटे पाहणी केली. त्या वेळी सर्वच आगारात अपुरी प्रकाश व्यवस्था दिसून आली. स्वारगेट आगारात तर सुरक्षारक्षकाच्या केबिनमध्ये प्रकाश व्यवस्था नव्हती; तसेच शिवशाही व इतर बसचे दरवाजे बंद करण्याच्या सूचना असताना अनेक बसचे दरवाजे उघडे होते. एसटी महामंडळाने आगाराच्या सुरक्षेच्या दृष्टिकोनातून ‘सुरक्षा ऑडिट’ करण्यात आले होते.

मात्र, त्यातील उपायांकडे दुर्लक्ष झाले आहे.पहाटे पावणेपाचची वेळ… शिवाजीनगर (वाकडेवाडी) आगारात बऱ्यापैकी गर्दी आणि त्यात महिलांची संख्यादेखील मोठ्या प्रमाणात… येथे अद्याप बऱ्याच कोपऱ्यांमध्ये अपुरी प्रकाशव्यवस्था… स्थानकावर महिला सुरक्षारक्षक नाहीत. सुरक्षारक्षक असले, तरी ते कार्यशाळा सांभाळण्यासाठीच… प्रवाशांचे त्यांना काहीही देणे-घेणे नाही अन् शिवशाही बसचे दरवाजे उघडे. त्यात कोणी जाऊन बसते का, याकडे दुर्लक्ष. शिवाजीनगर आगाराची सोमवारी पहाटे पाहणी केल्यानंतर अशी परिस्थिती दिसून आली. स्वारगेट आगारात तरुणीवर अत्याचाराची घटना घडल्यानंतर एसटी प्रशासन अद्याप गंभीर नसल्याचे दिसले. पुन्हा एखादी दुर्घटना घडण्याची प्रशासन वाट पाहतेय का, असा प्रश्न निर्माण झाला आहे.