चिमुकली घरातून शाळेसाठी निघाली, तेवढ्यात खाऊचं आमिष दाखवून नराधमाचं विकृत कृत्य; अत्याचाराच्या घटनेने पुणे पुन्हा हादरलं.

 पुणे पुन्हा एकदा अत्याचाराच्या घटनेने हादरलं. एका आठ वर्षीय चिमुकलीवर नराधमाने अत्याचार केल्याची घटना समोर आली असून परिसरात नागरिकांकडून संताप व्यक्त केला जात आहे. राज्यभरात महिलांवरील अत्याचाराच्या घटनांमध्ये दिवसेंदिवस वाढ होत आहे. त्यातच पुण्यातील वाघोली परिसरात शाळेत निघालेल्या मुलीवर एका नराधमाने अत्याचार केल्याची घटना समोर आली आहे. नराधमाने खाऊचं आमिष देऊन चौथीच्या विद्यार्थिनीवर अत्याचार केल्याचा प्रकार उघडकीस आला आहे. पुण्यातील वाघोली परिसरात ही घटना घडली असून या प्रकरणात २७ वर्षीय आरोपीला वाघोली पोलिसांकडून अटक करण्यात आली आहे. स्वारगेट बस स्थानकात नुकत्याच झालेल्या धक्कादायक घटनेनंतर पुन्हा एकदा पुणे अत्याचाराच्या घटनेने हादरलं आहे.

याबाबत वाघोली पोलिसांनी दिलेली माहिती अशी की, वाघोली परिसरात सकाळी सातच्या सुमारास विद्यार्थीनी घरुन शाळेत जाण्यासाठी निघाली होती. नेहमी प्रमाणे ती रसत्याने जात होती. त्याच रस्त्यावर पिठाची गिरणी आहे. हा नराधाम या पिठाच्या गिरणीत काम करतो. नेहमीप्रमाने ही चिमुरडी शाळेत जाण्यासाठी निघाली. त्यावेळी या नराधमाने खाऊचं आमिष तिला दाखवलं. त्यानंतर तिला गिरणीच्या दिशेने घेऊन गेला आणि तिच्यावर लैंगिक अत्याचार केला.घटना घडल्यानंतर संबंधित चिमुकली शाळेत न जाता रस्त्यावर येऊन रडत होती. स्थानिक नागरिकांनी तिला कसंबसं शांत केलं. त्यानंतर ती रडत का होती? अशी विचारणा केली. त्यावेळी तिने नागरिकांना सर्व प्रकार सांगितला. या घटनेनंतर नागरिकांनी सतर्कता दाखवत पोलिसांना ही बाब कळवली. पोलिसांनी घटनेचं गंभीर्य ओळखत आरोपीला ताब्यात घेतलं आहे. त्याच्याकडे पोलिसी खाक्या दाखवत विचारणा केली, त्यानंतर त्याने केलेल्या प्रकारची कबुली दिली आहे.या घटनेनंतर स्थानिक नागरिक आक्रमक झाल्याचं पहायला मिळालं. त्या नराधनमावर कठोर कारवाई करून त्याला फाशीची शिक्षा द्यावी, अशी मागणी स्थानिक नागरिकांडून करण्यात आली आहे.दरम्यान, काही दिवसांपूर्वी पुण्यातील स्वारगेट बस स्थानकात पहाटेच्या वेळी एका तरुणीवर अत्याचार करण्यात आला होता. तरुणाने मदत करण्याचं भासवून तरुणीवर अतिप्रसंग केला. या घटनेने नागरिकांमधून एकच संतापाची लाट उसळली होती. ही घटना ताजी असतानाच पुन्हा एका वाघोलीत झालेल्या चिमुकलीवरील अत्याचाराच्या घटनेने पुण्यात संताप व्यक्त होत आहे.