न्यायमूर्ती वर्मा आणखी अडचणीत; अर्धवट जळालेल्या नोटांचा व्हिडीओ पोलिस आयुक्तांकडून सादर.

 न्या. वर्मा यांच्या लुटियन्स दिल्लीतील निवासस्थानातून भारतीय चलनाच्या नोटा असलेल्या चार ते पाच गोण्या अर्धवट जळालेल्या स्थितीत आढळल्या, असे या अहवालात म्हटले आहे.न्यायमूर्ती यशवंत वर्मा यांच्या अडचणीत वाढ झाली असून त्यांच्या शासकीय निवासस्थानी जळालेल्या नोटांचे बंडल आढळल्याचा व्हिडीओ पोलिस आयुक्तांनीच प्रसृत केला आहे. तसेच या प्रकरणी आपण केलेल्या चौकशीतील प्राथमिक निष्कर्षांचा सखोल तपास करण्याची विनंती दिल्ली उच्च न्यायालयाच्या मुख्य न्यायमूर्तींनी केली आहे. यानंतर सरन्यायाधीश संजीव खन्ना यांनी वर्मा यांच्याविरोधातील आरोपांची अंतर्गत चौकशी करण्यासाठी एक समितीही स्थापन केली.न्या. वर्मा यांच्या निवासस्थानी कथितरित्या सापडलेल्या मोठ्या प्रमाणातील रोख रकमेबाबत दिल्ली उच्च न्यायालयाचे मुख्य न्यायमूर्ती देवेंद्र कुमार उपाध्याय यांनी आपला २५ पानी चौकशी अहवाल सरन्यायाधीशांना सादर केला. या अहवालाची छायाचित्रे आणि व्हिडीओ सर्वोच्च न्यायालयाने शनिवारी सायंकाळी उशिरा आपल्या वेबसाइटवर अपलोड केली. न्या. वर्मा यांच्या लुटियन्स दिल्लीतील निवासस्थानातून भारतीय चलनाच्या नोटा असलेल्या चार ते पाच गोण्या अर्धवट जळालेल्या स्थितीत आढळल्या, असे या अहवालात म्हटले आहे.‘घटनेची माहिती, उपलब्ध साहित्य आणि न्या. यशवंत वर्मा यांचे उत्तर यांचा तपास केला.

वर्मा यांच्या निवासस्थानी तैनात सुरक्षारक्षकाने दिलेल्या माहितीनुसार, १५ मार्चला सकाळी ज्या खोलीला आग लागली तेथून अर्धवट जळालेले सामान हटवण्यात आले आहे, असे पोलिस आयुक्तांनी १६ मार्चला आपल्या अहवालात नमूद केले आहे. या संपूर्ण प्रकरणाच्या सखोल चौकशीची गरज आहे,’ असे मुख्य न्यायमूर्ती उपाध्याय यांनी आपल्या अहवालात अधोरेखित केले.सरन्यायाधीशांनी स्थापन केलेल्या तीन सदस्यीय चौकशी समितीमध्ये न्या. शील नागू (पंजाब आणि हरियाणा उच्च न्यायालयाचे मुख्य न्यायाधीश), जी. एस. संधावालिया (हिमाचल प्रदेश उच्च न्यायालयाने मुख्य न्यायाधीश) आणि अनु शिवरमन (कर्नाटक उच्च न्यायालयाचे न्यायाधीश) यांचा समावेश आहे. न्या. वर्मा यांना कोणतेही न्यायालयीन कार्य न सोपवण्याचे आदेश दिल्ली उच्च न्यायालयाच्या मुख्य न्यायाधीशांना दिले आहेत,’ असे सर्वोच्च न्यायालयाने शनिवारी आपल्या निवेदनात म्हटले होते.दिल्ली पोलिस आयुक्त संजय अरोरा यांनी न्या. उपाध्याय यांना सादर केलेल्या व्हिडीओमध्ये जळालेल्या नोटा दिसत आहेत. अग्निमशन दिलाचे कर्मचारी आग विझवतानाही यामध्ये दिसते. दरम्यान, न्यायाधीश यशवंत वर्मा यांच्या निवासस्थानातून रोख रक्कम सापडल्याच्या वादाशी संबंधित महत्त्वपूर्ण दस्तावेज सार्वजनिक करण्याचा निर्णय घेतल्याबद्दल आणि या प्रकरणाच्या पुढील चौकशीसाठी अंतर्गत समिती स्थापन केल्याबद्दल रविवारी कायदा तज्ज्ञांनी भारताचे मुख्य न्यायाधीश संजीव खन्ना यांचे कौतुक केले.

न्या. वर्मा यांनी न्या. उपाध्याय यांना दिलेल्या उत्तरात आपल्यावरील आरोपांचा तीव्र शब्दांत निषेध केला. ‘उच्च न्यायालयाच्या अतिथीगृहात बैठकीदरम्याना मला सगळ्यात आधी व्हिडीओ व अन्य छायाचित्रे दाखवण्यात आली. व्हिडीओ पाहून मला धक्का बसला. घटनास्थळी जे मिळाले नाही, ते यामध्ये दाखवले गेले,’ असे ते म्हणाले. ‘मी या आरोपाचे खंडन करतो. आम्हाला जळालेल्या नोटांची कोणतीही गोणी दाखवली गेली नाही, ना सोपवण्यात आली. उरलेला राडारोडा अजूनही घराच्या एका भागात आहे,’ असे त्यांनी नमूद केले.दिल्ली उच्च न्यायालयाचा चौकशी अहवाल व सर्वोच्च न्यायालयाच्या वेबसाइटवर अपलोड केलेल्या व्हिडीओमुळे दिल्ली अग्निशमन सेवेने केलेल्या दाव्यावर प्रश्नचिन्ह उपस्थित झाले आहे. ‘न्या. वर्मा यांच्या निवासस्थानी अग्निशमन कर्मचाऱ्यांना रोख रक्कम मिळाली नाही,’ असा दावा त्यांनी केला होता.कुटुंबातील कोणत्याही सदस्याकडून ‘स्टोअर रूम’मध्ये कधीही रोख रोक्कम ठेवली नाही. मला अडकवण्याचा आणि बदनाम करण्याच्या कट यातून दिसत आहे.