शारिरीक संबंधास नकार दिल्याने हत्या, मग मृतदेहावर अत्याचार; नागपुरातील संतापजनक घटना.

 गुरुवारी तो रोहिणीला भेटायला तिच्या घरी गेला. यावेळी रोहिणी घरी एकटीच होती. तिचा पती ढाब्यावर तर मुलगी शाळेत गेली होती. त्याने तिला दारू पाजली अन्…हत्या केल्यानंतर महिलेच्या मृतदेहावर बलात्कार करण्यात आल्याची धक्कादायक माहिती तपासादरम्यान समोर आली. हुडकेश्वर पोलिसांनी खून व बलात्काराचा गुन्हा दाखल करून मारेकऱ्याला अटक केली. पोलिसांनी त्याला शनिवारी न्यायालयात हजर केले. न्यायालयाने त्याची मंगळवार, ११ फेब्रुवारीपर्यंत पोलिस कोठडीत रवानगी केली.

रोहित गणेश टेकाम (वय २५, रा. कान्हादेवी, पारशिवनी, सध्या रा. कापसी, भंडारा रोड) असे अटकेतील मारेकऱ्याचे नाव आहे. त्याने हुडकेश्वर पोलिस ठाण्याच्या हद्दीत राहणारी २३वर्षीय महिला रोहिणी (बदललेले नाव) हिचा खून केला. प्राप्त माहितीनुसार, रोहित हा कापसीतील उमिया धाम परिसरात श्रमिकाचे काम करतो. दोन वर्षांपूर्वी त्याची रोहिणीसोबत ओळख झाली. यावेळी रोहिणीही श्रमिक होती. त्यानंतर रोहितने तिला दारूचे व्यसन लावले. गुरुवारी तो रोहिणीला भेटायला तिच्या घरी गेला. यावेळी रोहिणी घरी एकटीच होती. तिचा पती ढाब्यावर तर मुलगी शाळेत गेली होती. त्याने तिला दारू पाजली. तिच्यावर बलात्काराचा प्रयत्न केला. रोहिणीने नकार दिला.संतापलेल्या रोहितने रोहिणीचे डोके टेबलावर आपटले. तिच्या नाकातून रक्त निघायला लागले. ती बेशुद्ध झाली. त्यामुळे रोहित घाबरला. त्याने रोहिणीच्या घरातून पळ काढला. मात्र, मोबाइल रोहिणीच्या घरी विसरल्याचे त्याच्या लक्षात आले. तो पुन्हा तिच्या घरी गेला. रोहिणी धाय मोकलून रडत होती. त्याने पुन्हा तिच्यावर बलात्काराचा प्रयत्न केला. रोहिणीने त्याला विरोध केला. रोहितने ओढणीने गळा आवळून तिचा खून केला. त्यानंतर तिच्यावर बलात्कार केला व पसार झाला.सायंकाळी ५.३० वाजताच्या सुमारास रोहिणीची मुलगी घरी आली. तिला रोहिणी बेशुद्धावस्थेत दिसली. मुलीने वडिलांना माहिती दिली. तिचे वडील घरी आले व रोहिणीला शुद्धीवर आणण्याचा प्रयत्न केला. ती शुद्धीवर आली नाही. तिचा मृत्यू झाल्याचे समजताच रोहिणीच्या पतीने शेजाऱ्यांना माहिती दिली. एकाने हुडकेश्वर पोलिसांना कळविले माहिती मिळताच वरिष्ठ पोलिस निरीक्षक ज्ञानेश्वर भदोडकर यांच्यासह पोलिसांचा ताफा तेथे पोहोचला.पंचनामा करून पोलिसांनी रोहिणीचा मृतदेह मेडिकल कॉलेज हॉस्पिटलकडे रवाना केला. पोलिसांनी कसून चौकशी केली. रोहिणीच्या मोबाइलचे कॉल डिटेल्स व परिसरातील सीसीटीव्ही फुटेज तपासले. तीन संशयितांना ताब्यात घेतले. कसून चौकशीदरम्यान रोहितने खून केल्यानंतर बलात्कार केल्याचे मान्य केले. पोलिसांनी त्याला अटक केली.