घोटभर पाणी अन् मुख्याध्यापकाच्या घरी विद्यार्थीनीसोबत घडलं भयंकर, इगतपुरीतील घटनेनं खळबळ.

 मुख्याध्यापकाने इयत्ता सहावीतील विद्यार्थिनीस घरी बोलावून तिच्यावर अत्याचार केल्याची घटना उघडकीस आली. इगतपुरी तालुक्यातील टाकेद येथे हा प्रकार घडल्याने खळबळ उडाली आहे.शाळा सुरू असताना मुख्याध्यापकाने इयत्ता सहावीतील विद्यार्थिनीस घरी बोलावून तिच्यावर अत्याचार केल्याची घटना उघडकीस आली. इगतपुरी तालुक्यातील टाकेद येथे हा प्रकार घडल्याने खळबळ उडाली आहे. या प्रकरणात मुख्याध्यापकसह एका शिक्षकास पोलिसांनी अटक करून त्यांच्याविरुद्ध पोक्सोअंतर्गत गुन्हा दाखल केला आहे.

टाकेद येथील एका शाळेत मुख्याध्यापक तुकाराम गोविंद साबळे (वय ५३) व त्याला मदत करणारा शिक्षक गोरखनाथ मारुती जोशी (वय ४३) कार्यरत आहेत. शुक्रवारी (दि. ७) दुपारी दीड ते दोन वाजेच्या सुमारास सहावीच्या वर्गात शिकणारी १३ वर्षीय पीडित विद्यार्थिनी वर्गात शिकत असताना मुख्याध्यापक तुकाराम साबळे याने या विद्यार्थिनीस जवळ बोलावून ‘मी सांगेल तेव्हा माझ्या घरी ये’ असे सांगून तिला घरचा पत्ताही दिला. त्यानंतर दुपारी एक वाजेच्या सुमारास वर्गात तास सुरू असताना शिक्षक गोरखनाथ जोशी याने या विद्यार्थिनीला सांगितले की, ‘तुझी आजी मुख्याध्यापक साबळे सरांच्या घरी आली आहे. तुला तेथे बोलावले आहे’ असे सांगून जोशी याने विद्यार्थिनीस साबळे याच्या टाकेद येथील घरी पाठवले. दुपारी दीड वाजेच्या सुमारास साबळे याने विद्यार्थिनी घरी आल्यानंतर बंगल्याचा दरवाजा बंद करून विद्यार्थिनीस पिण्याचे पाणी दिले. पाणी प्यायल्यानंतर तिला चक्कर आली त्यानंतर साबळे याने विद्यार्थिनीवर अत्याचार केला. शुद्धीवर येताच आपल्यावर अत्याचार झाल्याची जाणीव झाल्याने विद्यार्थिनीला रडू कोसळले. त्यावेळी ‘झालेला प्रकार कोणाला सांगू नको अन्यथा तुला व तुझ्या आजीला जीवे मारून टाकेन’, अशी धमकी साबळे याने विद्यार्थिनीला दिली.सायंकाळी पीडित विद्यार्थिनी घरी गेल्यानंतर तिला त्रास जाणवू लागल्याने तिने आजीला झालेल्या घटनेची माहिती दिली. त्यानंतर त्यांनी तत्काळ घोटी पोलिस ठाण्यात धाव घेऊन झालेल्या घटनेची माहिती दिली. घोटी पोलिस ठाण्याचे निरीक्षक विनोद पाटील, उपनिरीक्षक अजय कौटे, हवालदार सतीश शेलार, नीलेश साळवे, बबन शिंदे, दत्तू गायकवाड, बोराडे आदींनी तत्काळ घटनास्थळी धाव घेतली. या प्रकरणी पीडित विद्यार्थिनीच्या फिर्यादीवरून मुख्याध्यापक साबळे व शिक्षक जोशी यांच्याविरुद्ध गुन्हा दाखल करून त्यांना अटक केली.या गंभीर घटनेची माहिती समजताच ग्रामस्थ व पालकांनी शाळेच्या आवारात धाव घेत संताप व्यक्त करून निषेध नोंदवला. नराधमांना कठोर शासन करण्याची मागणी यावेळी करण्यात आली.या घटनेची गंभीरपणे दखल घेत राज्याचे शालेय शिक्षणमंत्री दादा भुसे यांनी दोन्ही संशयितांना सेवेतून बडतर्फ करण्याचे निर्देश शिक्षण विभागाला दिले आहेत. त्यानुसार कार्यवाही करीत शिक्षक व मुख्याध्यापक यांना निलंबित करण्यात आले आहे. तसेच या गुन्ह्याचा गंभीरपणे तपास करून संशयितांवर कठोर कारवाई करण्याचे निर्देशही जिल्हा पोलिस अधीक्षकांना भुसे यांनी दिले आहेत.