मुंबईत NCBची मोठी कारवाई; तब्बल २०० कोटींचे अमली पदार्थ जप्त, चौघांना अटक.

मोठ्या प्रमाणात अमली पदार्थांची तस्करी होणार असल्याची माहिती मुंबई विभागीय युनिटला मिळाली व ते अमली पदार्थ नवी मुंबई भागात असल्याचे समोर आले. त्या आधारे टाकलेल्या छाप्यात अमली पदार्थांचा मोठा साठा हाती लागला.नार्कोटिक्स कंट्रोल ब्युरोच्या (एनसीबी) मुंबई युनिटने अलीकडील सर्वांत मोठी कारवाई केली असून त्यांनी २०० कोटी रुपयांचे अमली पदार्थ जप्त केले. त्यामध्ये कोकेन, गांजा व कॅनेबीज या प्रकारच्या जवळपास २२ किलो अमली पदार्थांचा समावेश आहे. या कारवाईबद्दल केंद्रीय गृहमंत्री अमित शहा यांनी ‘एक्स’वरून एनसीबी मुंबईचे अभिनंदन केले आहे.

एनसीबी मुंबईने विभागीय अतिरिक्त आयुक्त अमित घावटे यांच्या नेतृत्वाखाली जानेवारी महिन्यात २०० ग्रॅम कोकेन जप्त केले होते. त्या कारवाईनंतर गुप्त माहितीच्या आधारे एका आंतरराष्ट्रीय कुरिअर कंपनीच्या कार्यालयात ऑस्ट्रेलियाला जाणाऱ्या पार्सलची तपासणी करण्यात आली. तेथून प्राप्त माहितीच्याआधारे तांत्रिक व मानवी अभ्यास करण्यात आला. त्यानंतर अशा प्रकारे मोठ्या प्रमाणात अमली पदार्थांची तस्करी होणार असल्याची माहिती मुंबई विभागीय युनिटला मिळाली व ते अमली पदार्थ नवी मुंबई भागात असल्याचे समोर आले. त्या आधारे टाकलेल्या छाप्यात अमली पदार्थांचा मोठा साठा हाती लागला.यामध्ये उच्च दर्जाचे ११.५४० किलो कोकेन, ४.९० किलो हायड्रोपोनिक गांजा व ५.५० किलो वजनी कॅनाबीज जप्त करण्यात आले. या अमली पदार्थांची २०० पाकिटे होती. यासोबतच १.६० लाख रुपयांची रोखही ताब्यात घेण्यात आली आहे. या प्रकरणी आत्तापर्यंत चौघांना अटक करण्यात आली आहे.परदेशातील टोळी सक्रियया तस्करीत परदेशातील टोळी सक्रिय असल्याचे तपासात समोर आले आहे. जप्त करण्यात आलेल्या अमली पदार्थांपैकी काही पदार्थ हे अमेरिकेतून मुंबईत आणले. ते मुंबईत पाठविण्यासाठी परदेशातील टोळी सक्रिय होती. मुंबईतून हे अमली पदार्थ देशाच्या विविध भागांतील दलाल, विक्रेत्यांना कुरिअरच्या माध्यमातून पोहोचवले जाणार होते. मुख्य म्हणजे, या साखळीत सहभागी दलाल एकमेकांना अनोळखी असून ते विविध नावांचा वापर करून एकमेकांच्या संपर्कात होते, असे तपासात समोर आले आहे.