इकडे ठाकरेंच्या हस्ते ‘शिवबंधन’ पुस्तकाचं प्रकाशन, तिकडे शिवबंधन सोडून दहा जणांचा ‘​वर्षा’वर शिवसेना प्रवेश.

 छत्रपती संभाजीनगर पश्चिम विधानसभा मतदारसंघाचे आमदार व जिल्ह्याचे पालकमंत्री संजय शिरसाट यांनी शिवसेना ठाकरे पक्षाला हादरा दिला.शिवसेना (उद्धव बाळासाहेब ठाकरे) पक्षाला शुक्रवारी छत्रपती संभाजीनगर येथे मोठा झटका बसला. पक्षाच्या दहा माजी नगरसेवकांनी आमदार प्रदीप जैस्वाल यांच्या नेतृत्वाखाली शिवसेनेत प्रवेश केला. प्रवेश करणाऱ्यांमध्ये पालिकेच्या माजी सभापती, माजी सभागृह नेत्यांचा समावेश आहे. हा प्रवेश सोहळा मुंबईत ‘वर्षा’ निवासस्थानी शिवसेनेचे नेते तथा उपमुख्यमंत्री एकनाथ शिंदे यांच्या हस्ते झाला. कालच्या दिवसात ठाकरेंचे सहा खासदार पक्ष सोडणार असल्याची चर्चा असतानाच संभाजीनगरमध्ये मात्र खरोखर धक्का बसला.

छत्रपती संभाजीनगर पश्चिम विधानसभा मतदारसंघाचे आमदार व जिल्ह्याचे पालकमंत्री संजय शिरसाट यांनी शिवसेना ठाकरे पक्षाला हादरा देऊन, माजी महापौर, शिवसेना ठाकरे पक्षाचे मराठवाडा सचिव व काही माजी नगरसेवक, पदाधिकाऱ्यांचा शिवसेनेत प्रवेश घडवून आणला, पश्चिम मतदारसंघात पक्ष संघटनेची स्थिती भक्कम करण्याचा शिरसाट यांनी प्रयत्न केला.मध्य विधानसभा मतदारसंघाचे आमदार प्रदीप जैस्वाल यांनी ठाकरे पक्षाला धक्का दिला. या मतदारसंघातील ठाकरे पक्षाचे दहा माजी नगरसेवक शिवसेनेत दाखल झाले. या वेळी खासदार संदीपान भुमरे, शिवसेना पक्षाचे शहरप्रमुख विश्वनाथ राजपूत, हृषीकेश जैस्वाल यांच्यासह अन्य पदाधिकारी उपस्थित होते. विश्वनाथ राजपूत यांनी प्रवेश सोहळ्याचे सूत्रसंचालन केले.शिवसेनेत प्रवेश करणाऱ्यांमध्ये स्थायी समितीचे माजी सभापती मोहन मेघावाले, माजी सभागृह नेते किशोर नागरे यांचा समावेश आहे. माजी नगरसेवक मकरंद कुलकर्णी, अनिल जैस्वाल, रूपचंद वाघमारे, स्वाती नागरे, ज्योती वाघमारे, मीना गायके, ज्योती पिंजरकर, सीमा खरात यांनीही शिवसेनेत प्रवेश केला.