तुमचाही मस्साजोगचा संतोष देशमुख करु; तानाजी सावंतांच्या पुतण्याला धमकी, पत्रासोबत शंभराची नोट,

तुमचाही ‘बीडमधील मस्साजोगचा सरपंच संतोष देशमुख करु’ अशी धमकी दोघांना पत्राद्वारे देण्यात आल्याने एकच खळबळ उडाली आहे.  राज्याचे माजी आरोग्यमंत्री, परांडा भूम विधानसभा मतदारसंघाचे आमदार डॉक्टर तानाजी सावंत यांचे पुतणे असलेले जिल्हा परिषद धाराशिवचे माजी उपाध्यक्ष धनंजय सावंत, तसेच धाराशिव जिल्हा मध्यवर्ती सहकारी बँकेचे संचालक केशव सावंत यांना पत्राद्वारे धमकी देण्यात आली आहे. तुमचाही ‘बीडमधील मस्साजोगचा सरपंच संतोष देशमुख करु’ अशी धमकी दोघांना पत्राद्वारे देण्यात आल्याने एकच खळबळ उडाली आहे. याबाबत अधिक माहिती अशी की, दिनांक २२ डिसेंबर रोजी रात्री दहा वाजून पंधरा मिनिटांनी मुळेवाडी पाटी येथे अज्ञात इसमाने तेरणा सहकारी साखर कारखाना येथे ऊस वाहतूक करणारा ट्रॅक्टर चालक गोपाळ प्रकाश आडे (राहणार पुसद) याकडे खाकी रंगाचे पॅकेट दिले. या पॅकेटमध्ये पांढऱ्या कागदावर पेन्सिलने धनंजय सावंत केशव सावंत यांना ‘मस्साजोग संतोष देशमुख करू’ असा मजकूर लिहिला होता. तसेच यामध्ये एक शंभराची नोट देखील होती.यापूर्वी देखील धनंजय सावंत यांच्या घरावर १३ सप्टेंबर रोजी रात्री बारा वाजता अज्ञाताने गोळीबार केला होता.

ते प्रकरण शांत होत नाही, तोच आता पत्राद्वारे धमकी मिळाल्याने धनंजय सावंत, केशव सावंत यांच्या जीवितास धोका निर्माण झालाय का? असा प्रश्न देखील निर्माण होताना दिसत आहे. दरम्यान, या प्रकरणी संजय बाबुराव निपाणीकर (वय वर्ष ४१, राहणार निपाणी, तालुका कळंब, जिल्हा धाराशिव) यांनी ढोकी पोलीस स्टेशनला फिर्याद दिली असून डोकी पोलीस स्टेशनचे पोलीस उपनिरीक्षक मोरे हे अधिक तपास करत आहेत. बीड जिल्ह्यातील मस्साजोग येथील सरपंच संतोष देशमुख यांची निर्घृणपणे हत्या करण्यात आली होती. यापैकी काही आरोपींना अटक झाली असून काही जण फरार आहेत. मात्र आरोपींवर कडक कारवाई केली जाईल. राज्य शासन देशमुख कुटुंबीयांसोबत खंबीरपणे आहे, हा उपमुख्यमंत्री एकनाथ शिंदे यांचा संदेश आहे, असे राज्याचे उद्योगमंत्री उदय सामंत यांनी सोमवारी देशमुख कुटुंबीयांचे सांत्वन करताना सांगितले. सामाजिक न्यायमंत्री संजय शिरसाट तसेच राज्यमंत्री मेघना साकोरे- बोर्डीकरही या प्रसंगी उपस्थित होत्या. मंत्र्यांनी या वेळी गावकऱ्यांशी चर्चा करून त्यांचे म्हणणे ऐकून घेतले.