गायक शान राहत असलेल्या इमारतीमध्ये भीषण आग; वांद्रे परिसरातील घटनेचा Video आला समोर

 बॉलिवूडचा लोकप्रिया पार्श्वगायक शान राहत असणाऱ्या वांद्रे, मुंबईतील निवासी इमारतीला मंगळवारी पहाटे आग लागली. गायक शान राहत असणाऱ्या मुंबईतील निवासी इमारतीला मंगळवारी पहाटे आग लागली. आगीचे वृत्त समोर येताच अग्निशमन दलाने घटनास्थळी धाव घेतली. या आगीचा व्हिडिओही समोर आला आहे, ज्याच धुराचे लोट स्पष्टपण दिसतायंत.मंगळवारी पहाटे वांद्रे पश्चिम परिसरात असणाऱ्या या फॉर्च्यून एन्क्लेव्ह या निवासी इमारतीच्या सातव्या मजल्यावर भीषण आग लागली होती. साधारण १.५० वाजता पहाटे ही आगीची घटना घडली. याच इमारतीच्या अकराव्या मजल्यावर बॉलिवूडचा प्रसिद्ध पार्श्वगायक शान वास्तव्यास आहे. ज्यावेळी ही घटना घडली तेव्हा शान घरात उपस्थित होता की नाही, याबद्दल अधिकृत माहिती समोर आलेली नाही.

या घटनेमध्ये एका ८० वर्षीय महिलेला श्वसनाचा त्रास होऊ लागल्याने त्यांना रुग्णालयामध्ये भरती करण्यात आले. सध्या त्यांच्यावर जवळच्या एका खासगी रुग्णालयामध्ये आयसीयूमध्ये उपचार सुरू आहेत. याशिवाय इमारतीचेही मोठे नुकसान झाले आहे.इंडिया टुडेने दिलेल्या वृत्तानुसार, आग विझवण्यासाठी आणि फॉर्च्यून एन्क्लेव्हमधील रहिवाशांना बाहेर काढण्यासाठी अग्निशमन विभागाच्या १० गाड्या तातडीने घटनास्थळी दाखल झाल्या होत्या. प्राथमिक तपासात शॉर्ट सर्किटमुळे आग लागल्याची शक्यता वर्तवली जात आहे. असे असले तरीही या आगीची घटना कशामुळे घडली, याविषयी अधिकृत निवेदन अद्याप आलेले नाही. घटनेच्या वेळी गायक शान या इमारतीत उपस्थित होता की नाही याबद्दलही माहिती समोर आलेली नाही. शाननेदेखील कोणतीही प्रतिक्रिया अजूनपर्यंत दिलेली नाही. सोमवारी सायंकाळी मानखुर्द येथील कुर्ला भंगार बाजारातही आगीची घटना घडली. या भागात भीषण आगीत ३० ते ४० गोदामे जळून खाक झाली आहेत. कोणतीही जीवितहानी झाली नसली तरी या घटनेमुळे मालमत्तेचे मोठे नुकसान झाले. यामागे नेमके काय कारण असावे, याचा तपास अग्निशमन दलाकडून केला जातो आहे.