जयपूर-अजमेर महामार्गावर चार दिवसानंतर पुन्हा मोठा अपघात, 10 जखमी, मदतकार्य सुरू

 जयपूर अजमेर महामार्गावर एका भरधाव ट्रकने बसला धडक दिल्याने 10 जण गंभीर जखमी झाले आहेत. जखमींना सवाई मान सिंह रूग्णालयात दाखल करण्यात आले आहे. चार दिवसांमध्ये या महामार्गावर हा दुसरा मोठा अपघात असून, नागरिकांमध्ये भीतीचे वातावरण निर्माण झाले आहे. राजस्थानच्या जयपूर अजमेर महामार्गावर अजून एक मोठा अपघात झालाय. या आठवड्यातील हा दुसरा मोठा अपघात म्हणावा लागणार आहे. येथे एका भरधाव ट्रकने बसला धडक दिली. या अपघातात 10 जण गंभीर जखमी झाल्याची माहिती मिळत आहे. जखमींना जवळच्या रूग्णालयात दाखल करण्यात आलंय आणि त्यांच्यावर उपचार सुरू आहेत. मात्र, हा अपघात नेमका कसा झाला, याबद्दल अधिक माहिती मिळू शकली नाही. अपघाताची घटना कळताच पोलिसांनी घटनास्थळी धाव घेतली. मिळालेल्या माहितीनुसार, जयपूर जिल्ह्यातील चांदपोल ते बागरूला जाणाऱ्या जेसीटीएसएल बससोबत हा अपघात झालाय. ज्यावेळी ही अपघाताची घटना घडली, त्यावेळी बसमध्ये प्रवासी मोठ्या संख्येने होते. अपघातात गंभीर जखमी झालेल्यांना जवळच्या सवाई मान सिंह रूग्णालयात दाखल करण्यात आलंय. अपघातानंतर काही काळ मोठी वाहतूककोंडी झाली होती. अपघाताची माहिती कळताच अनेकांनी घटनास्थळी धाव घेतली.

जयपूर महामार्गावरील अपघाताची माहिती मिळताच पोलिस प्रशासन घटनास्थळी दाखल झाले आणि त्यांनी जखमींना उपचारासाठी पाठवत मदतकार्य सुरू केले. चार दिवसांपूर्वीच म्हणजेच 20 डिसेंबर रोजी जयपूर अजमेर महामार्गावरच एक भीषण अपघात झाला. त्यामध्ये 14 लोकांचा मृत्यू झाला. अजूनही काही गंभीर रूग्णावर उपचार सुरू असल्याची माहिती मिळतंय. सीएनजी गॅसच्या टॅंकरचा अचानक स्फोट झाल्याने मोठी आग लागली होती. या आगीत 14 लोकांचा मृत्यू तर 80 पेक्षा जास्त लोक गंभीर जखमी झाले. यासोबतच 40 गाड्यांचे मोठे नुकसान झाले. ही आगीची घटना ताजी असताना परत एकदा जयपूर अजमेर महामार्गावर अपघात झालाय. या महामार्गावर हा दुसरा मोठा अपघात चार दिवसांच्या अंतरावर झालाय, यामुळे नागरिकांमध्ये भीतीचे वातावरण बघायला मिळतंय. प्रशासनाकडून या अपघाताबद्दल अजून काही माहिती देण्यात नाही आली. क्रेनच्या मदतीने अपघातग्रस्त वाहने प्रशासनाकडून बाजुला काढली गेली आहेत.