चंद्रपूर जिल्हा बँक परीक्षेत डमी परीक्षार्थी? विद्यार्थ्यांचा संताप, पोलिस आले अन् तोतया विद्यार्थी पसार!

नोकर भरतीसाठी शनिवार व रविवार असे दोन दिवस परीक्षा झाली. शनिवारी ऐनवेळी परीक्षा रद्द करण्याची घटना समोर आली होती. त्यातच दुसऱ्या दिवशीही गोंधळ समोर आला आहे. चंद्रपूर जिल्हा मध्यवर्ती सहकारी बँक परीक्षेत छत्रपती संभाजीनगरमधील परीक्षा केंद्रावर रविवारी गोंधळ उडाला. ब्लू टूथद्वारे कॉपी करत, तोतया विद्यार्थी परीक्षा देत असल्याचा आरोप करत परीक्षार्थी विद्यार्थ्यांनी संताप व्यक्त केला. पोलिसांना पाचारण करण्यात आले. परंतु, तोपर्यंत तो विद्यार्थी परीक्षा केंद्रावरुन पळून गेला. आणि त्याच्याकडे मोबाइल, इतर साहित्य सापडल्याचे प्रत्यक्षदर्शी विद्यार्थ्यांनी सांगितले. नोकर भरतीसाठी शनिवार व रविवार असे दोन दिवस परीक्षा झाली. शनिवारी ऐनवेळी परीक्षा रद्द करण्याची घटना समोर आली होती. त्यातच दुसऱ्या दिवशीही गोंधळ समोर आला आहे.  बँकेच्या लिपिक, शिपाई आदी साडेतिनशे पेक्षा अधिक पदांसाठी परीक्षा झाली. खासगी कंपनीला परीक्षा घेण्याची जबाबदारी देण्यात आली. शनिवारच्या परीक्षेत राज्यभरातील हजारो विद्यार्थ्यांना मनस्ताप सहन करावा लागला होता. रविवारी लिपीक पदासाठीची परीक्षा झाली. सुमारे २६१ लिपिक पदासाठी पदासाठी विविध केंद्रावरुन परीक्षा घेण्यात आली. छत्रपती संभाजीनगरमध्ये डॉ. बाबासाहेब आंबेडकर कला व वाणिज्य महाविद्यालयात परीक्षा केंद्र होते. दोन सत्रात ही परीक्षा घेण्यात आली. विद्यार्थ्यांनी दिलेल्या माहितीनुसार सकाळच्या सत्रात पेपर संपण्याच्या काही मिनीटे आधी एक विद्यार्थी सारखा कानाला हात लावत असल्याचे लक्षात आले. अधिक पाहिले असता ऐकूण काही लिहत असल्याचे लक्षात आले. आणि परीक्षा केंद्रावर असलेल्या कर्मचाऱ्याकडे विद्यार्थ्यांनी हा प्रकार सांगितला. तोपर्यंत इतर विद्यार्थी ही त्याच्या जवळ जमा झाले. त्याची तपासणी करत असताना त्याच्याकडे बुटामध्ये मोबाइलसह इतर साहित्य आढळूण आले. यानंतर विद्यार्थ्यांनी संताप व्यक्त करत परीक्षा कक्षाबाहेर घोषणाबाजी, संताप व्यक्त केला. पोलिसांना पाचारण करण्यात आले. परंतु संबंधित विद्यार्थी परीक्षा केंद्रावरुन पसार झाल्याचे सांगण्यात आले. प्रत्यक्षदर्शी परीक्षार्थी विद्यार्थ्यांनी सांगितले की, ऑनलाइन परीक्षा घेतली गेली. परीक्षा कक्षात सोडताना तपासणी करण्यात आली का नाही. संबंधित परीक्षा घेणाऱ्या यंत्रणेकडून दुर्लक्ष करण्यात आल्यानेही विद्यार्थ्यांचा संताप अनावर झाल्याचेही विद्यार्थ्यांनी सांगितले. पोलिसांनी विद्यार्थ्यांना या प्रकरणी तक्रार देण्यास सांगितले. तर कंपनीकडून ऑनलाइन तक्रार दाखल करण्यात येणार असल्याचे संबंधित केंद्रावर उपस्थित कर्मचाऱ्यांनी यावेळी सांगितले. परीक्षा केंद्रावर उपस्थित कर्मचारी नवरंग लाल यांनी सांगितले की, आयटीआय कंपनी परीक्षा घेत आहे. परीक्षेसाठी डीसीएस कंपनी मनुष्यबळ पुरविण्याचे काम करते आहे. आम्ही परीक्षेचे नियोजन केले आहे. संबंधित विद्यार्थ्याकडे ब्लू टूथ, मोबाइल आढळला. विद्यार्थ्यांनी त्याला पकडले होते परंतु तो पळून गेला. त्यासह त्याचा पेपर ब्लॉक करण्यात आला आहे. वरिष्ठांना कळविण्यात आले असून ऑनलाइन तक्रार करण्यात आल्याचेही त्यांनी सांगितले.