तापमान 1000 डिग्रीपार; चिमण्या, श्वानांचा अक्षरश: कोळसा; विमान अपघातानंतर भयंकर परिस्थिती.

 अहमदाबादमध्ये गुरुवारी एअर इंडियाच्या विमानाचा भीषण अपघात झाला. त्यावेळी मदतकार्यास गेलेल्या एसडीआरएफच्या जवानाने तेथील परिस्थितीची भीषणता सांगितली आहे.अहमदाबादमध्ये गुरुवारी एअर इंडियाच्या AI171 विमानाला अपघात झाला. अपघातानंतर घटनास्थळी मोठी आग लागली. आगीमुळे आसपासचं तापमान 1,000 डिग्री सेल्सियसपर्यंत पोहोचलं होतं. यामुळे मदत आणि बचाव कार्यात खूप अडचणी आल्या. आसपासच्या कुत्र्यांना आणि चिमण्यांसहित इतर पक्ष्यांना पळून जायला वेळ मिळाला नाही. तेही या आगीत मृत्युमुखी पडले. केंद्रीय गृहमंत्री अमित शाह यांनी याबद्दल माहिती दिली. ते म्हणाले, विमानात 1.25 लाख लीटर एटीएफ (ATF) म्हणजे विमान इंधन होतं. त्यामुळे आग लागल्याने कोणालाही वाचवणं शक्य नव्हतं. अहमदाबाद विमानतळावरून लंडनला जाणारे एअर इंडियाचे बोईंग 787-8 ड्रीमलाइनर विमान होते. विमानात क्रू मेंबर्स (crew members) सहित 242 लोक होते. त्यापैकी फक्त एक प्रवासी वाचला आहे.

न्यूज एजन्सी पीटीआयने (PTI) स्टेट डिझास्टर रिस्पॉन्स फोर्स (SDRF) च्या एका अधिकाऱ्याच्या हवाल्याने माहिती दिली आहे. SDRF टीम दुपारी 2 ते 2.30 च्या दरम्यान बी. जे. मेडिकल कॉलेजच्या हॉस्टेल आणि डॉक्टरांच्या घरांच्या परिसरात पोहोचली. याच ठिकाणी विमान क्रॅश झालं होतं. त्याआधी, काही स्थानिक लोकांनी काही जणांना जिवंत बाहेर काढलं. पण एसडीआरएफच्या टीमला कोणीही जिवंत सापडलं नाही. एका अग्निशमन अधिकाऱ्याने सांगितलं, “जसा विमानाचा इंधन टँक फुटला, तशी भयंकर आग लागली. तापमान खूप लवकर 1,000 डिग्री सेल्सियसपर्यंत पोहोचलं. त्यामुळे कोणालाही वाचण्याची संधी मिळाली नाही.”एसडीआरएफच्या एका जवानाने सांगितलं की त्यांनी याआधी अनेक नैसर्गिक आपत्त्यांमध्ये काम केलं आहे. पण त्यांनी याआधी असं दृश्य कधीच पाहिलं नव्हतं. ते म्हणाले, “आम्ही पीपीई किट घालून आलो होतो. पण तापमान इतकं जास्त होतं की काम करणं खूप कठीण होतं. सगळीकडे ढिगारा पसरलेला होता. त्यामुळे आम्हाला आधी जळलेला ढिगारा बाजूला करावा लागला.” अधिकाऱ्याने सांगितलं की त्यांच्या टीमने लहान मुलांसहित 25-30 लोकांचे मृतदेह बाहेर काढले. ते म्हणाले, “शवांची ओळख पटवण्यासाठी डीएनए टेस्ट करावी लागेल.”एसडीआरएफच्या आणखी एका अधिकाऱ्याने सांगितलं की त्यांनी किती मृतदेह बाहेर काढले, त्यांनी हॉस्टेल परिसरात असलेल्या कुत्र्यांच्या आणि पक्ष्यांच्या मृतदेहांकडे इशारा करत सांगितलं, “हे इतकं लवकर घडलं की प्राण्यांना आणि पक्ष्यांनाही पळायला वेळ मिळाला नाही.” या अपघातात प्रवासी आणि क्रू मेंबर्ससोबत मेडिकल कॉलेजच्या हॉस्टेलमध्ये राहणारे विद्यार्थी, डॉक्टर आणि त्यांचे कुटुंबीय, असे काही लोकही मारले गेले. पोलिसांनी सांगितलं की 265 मृतदेह सिव्हिल हॉस्पिटलमध्ये आणले आहेत. पण प्रशासनाने अजून मृतांची अधिकृत संख्या जाहीर केलेली नाही.या घटनेमुळे संपूर्ण देश हादरला आहे. लोक मृतांच्या कुटुंबियांबद्दल शोक व्यक्त करत आहेत. सरकारने या घटनेची चौकशी करण्याचे आदेश दिले आहेत.