कोल्हापुरात ढगफुटीसदृश्य पाऊस, ओढे-नाले तुडुंब, अनेक घरात पाणी शिरलं, जनजीवन विस्कळीत, शेतीचंही नुकसान.

कोल्हापूर शहरासह जिल्ह्यात गुरुवारी सायंकाळी मुसळधार पावसाने थैमान घातले, ज्यामुळे जनजीवन विस्कळीत झाले. अनेक भागांमध्ये पाणी साचल्याने नागरिकांचे मोठे हाल झाले, ओढ्यात वाहून गेलेल्या दोघांपैकी एकाला वाचवण्यात यश आले असून दुसऱ्याचा शोध सुरू आहे. पेरणी केलेल्या शेतांमध्ये पाणी शिरल्याने शेतकऱ्यांचे मोठे नुकसान झाले आहे.शहरासह जिल्ह्याला पावसाने अक्षरश: झोडपलं आहे. गुरुवारी सायंकाळच्या सुमारास विजांच्या कडकडाटासह मुसळधार पावसाने लावलेल्या जोरदार हजेरीमुळे शाळा आणि ऑफिसमधून घरी जाणाऱ्या विद्यार्थी, नागरिकांना मोठी कसरत करावी लागली. शहरातील अनेक सखल भागात गुडघाभर पाणी साचल्यामुळे तसंच अनेक आस्थापनात आणि घरांमध्ये पाणी शिरल्याने जनजीवन विस्कळीत झालं आहे. तर पुणे-बेंगलोर राष्ट्रीय महामार्गावर अनेक ठिकाणी पावसाचे पाणी आल्याने वाहतूक मंदावली. दुसरीकडे गोकुळ शिरगाव आणि सरनोबतवाडी येथे दोघेजण ओढ्याच्या पाण्यात वाहून गेले असून यातील एकाला आपत्ती व्यवस्थापन विभागाकडून रिस्क्यू करण्यात यश आलंय, तर अन्य एकाचा शोध सुरू आहे.तब्बल १५ दिवसांच्या विश्रांतीनंतर पावसाने पुन्हा आपली बॅटिंग सुरू केली आहे. भारतीय हवामान विभागाने गुरुवारी कोल्हापूरसह राज्यातील अनेक जिल्ह्यांना ऑरेंज अलर्ट दिला होता. सकाळी झालेल्या पावसाच्या हलक्या सरीनंतर वातावरणात काहीसा उष्मा जाणवत होता.

मात्र सायंकाळच्या सुमारास अचानक सुरू झालेल्या मेघगर्जनेसह तुफान पावसाने कोल्हापूरचे रस्ते जलमय झाले होते. सुमारे तासभर पडलेल्या ढगफुटीसदृश्य पावसामुळे जिल्ह्यातील ग्रामीण भागासह कोल्हापूर शहरात सर्वत्र पाणीच-पाणी पाहायला मिळालं. शहराच्या सखल भागात राजारामपुरी, दुधाळी परिसर, सरनाईक वसाहत, परीख पूल, पाचगाव सह अनेक भागातील घरांमध्ये पाणी शिरल्याने आपत्ती व्यवस्थापन कक्षाकडून या ठिकाणी अडकलेल्या नागरिकांना सुरक्षित स्थळी हलवण्यात आलं.काही इमारतींच्या बेसमेंटमध्ये पाणी शिरल्याने भर पावसात नागरिकांना आपली वाहनं इतरत्र सुरक्षित हलवावी लागली. तर शहरातील काही भागात विदयुत पुरवठा खंडित करण्यात आला. कोल्हापूर शहरातील राजारामपुरी परिसरातील बागेतील टाकी देखील वाहून गेली असून अनेक खेळणी तुटली. ऐन ऑफिस सुटायच्या वेळेत मुसळधार पावसाचं पाणी रस्त्यावर आल्याने मोठ्या प्रमाणात वाहतूक कोंडी झाल्याचं दिसून आलं. दरम्यान वाहतूक शाखेच्या पोलिसांनी ऐन पावसात आपली जबाबदारी पार पाडत वाहतूक सुरळीत केली. पहिल्याच पावसाने कोल्हापुरला जलमय केलंय.पुणे-बेंगलोर राष्ट्रीय महामार्गावरील गोकुळ शिरगाव येथील ओढयावर पाणी आल्यामुळे राष्ट्रीय महामार्गावरील वाहतूक काहीशी मंदावली होती.

याच ठिकाणी ओढ्याचं पाणी पाहण्यासाठी गेलेल्या तरुणाचा तोल जाऊन तो ओढ्याच्या पाण्यात वाहून जात असताना गोकुळ शिरगाव येथील स्थानिक रहिवाशांनी दोरीच्या साहाय्याने त्याला वाचवण्याचा प्रयत्न केला. मात्र हातातून दोरी सटकल्यामुळे पुन्हा तो ओढ्याच्या पाण्यात वाहू गेला, यानंतर तरुणाने पुढे जाऊन झाडाला पकडलं आणि स्थानिक तरुणांनी त्याला पाण्यातून बाहेर काढत रेस्क्यू केलं. तर कोल्हापूर शहराजवळ सरनोबतवाडी येथेही शाळकरी मुलगा सायकलवरून जात असताना पावसाच्या पाण्यात सायकल घातल्याने, पाण्याला प्रवाह जास्त असल्याने सायकलवरून तो वाहून गेला असून जिल्हा आपत्ती व्यवस्थापन कक्षाचं बचाव पथ या मुलाचा शोध घेत आहेत.आठवडाभरापूर्वी पडलेल्या पूर्व पावसामुळे मशागत झाली नसल्याने शेतकरी बांधव अडचणी सापडले होते, यानंतर पावसाने आठ दिवस उघडीप दिली. शेतीतील मशागती पूर्ण झाल्या. काही शेतकऱ्यांनी पेरणीही केली होती. मात्र ढगफुटी सदृश्य पावसामुळे पेरणी झालेल्या शेतामध्ये गुडघाभर पाणी साचून राहिल्याने पेरणी केलेल्या शेताचं मोठं नुकसान झालं आहे.