वटसावित्रीच्या दिवशीच पतीला अखेरचा निरोप; चिमुकल्या प्रणयचा पप्पाला शेवटचा सॅल्यूट.

मुंब्रा येथे झालेल्या भीषण रेल्वे दुर्घटनेत जीआरपी जवान विकी मुख्यदल यांचा मृत्यू झाला होता. त्यांच्यावर मंगळवारी अंत्यसंस्कार करण्यात आले.रात्रपाळीचे कर्तव्य पूर्ण करून घराकडे निघालेले रेल्वे पोलिस (जीआरपी) विकी मुख्यदल मुंब्रा रेल्वे दुर्घटनेत मृत्यू झाला. मंगळवारी जुमडा येथे शासकीय इतमामात त्यांच्या पार्थिवावर अंत्यसंस्कार करण्यात आले. त्यांना अखेरची मानवंदना देण्यासाठी पंचक्रोशीतील हजारो नागरिक जमले होते. वटपौर्णिमेला एकीकडे सुहासिनी आपल्या पतीराजाच्या दीर्घायुष्यासाठी मनोकामना करीत होत्या, तर दुसरीकडे विकी यांच्या पत्नी दीपालीवर पतीला अखेरचा निरोप देण्याची वेळ आली.
मुंब्रा रेल्वे अपघातात चार जणांचा मृत्यू झाला. यातील विकी हे एक होते. मंगळवारी त्यांचे पार्थिव मूळ गावी आणण्यात आले. भिवगाव ते जुमडा गावादरम्यान देशभक्तीपर गीते वाजवित त्यांची अंत्ययात्रा काढण्यात आली. अधिकाऱ्यांसह उपस्थितांनी पुष्पचक्र वाहून त्यांना श्रद्धांजली अर्पण केली. पोलिस दलाच्या पथकाने बिगुल फुंकला तसेच बंदुकीच्या तीन फैरी हवेत झाडून मानवंदना दिली. चिमुकला मुलगा प्रणयने पित्याच्या चितेला भडाग्नी दिला.

सकाळी गर्दीच्या वेळेत कसारा-सीएसएमटी लोकल मुंबई दिशेला आणि सीएसएमटी-कर्जत लोकल कल्याण दिशेला धावत असताना मुंब्रा स्थानक परिसरात एक घटना घडली. यात आठ प्रवासी रुळांवर आणि पाच प्रवासी लोकलमध्ये पडले. रुळांवरील चार प्रवाशांचा मृत्यू झाला असून, नऊ प्रवासी जखमी झाले आहेत. रुळांवर आणि लोकलमध्ये प्रवासी कसे पडले, या एका घटनेचा शोध मध्य रेल्वे आणि रेल्वे पोलिस यांच्याकडून स्वतंत्रपणे सुरू आहे.मुंब्रा घटनेतील १३ प्रवाशांपैकी चार प्रवाशांचा मृत्यू झाला आहे. उर्वरित जखमी प्रवाशांचे तपास नोंदवण्याचे काम सुरू आहे. जखमींतील काही प्रवासी अद्यापही लोकलमधून पडल्याच्या घटनेतून स्थिरस्थावर झालेले नाहीत. काही जखमींसह घटनेचे प्रत्यक्षदर्शी, मुंब्रा रेल्वे स्थानकातील कर्मचारी आणि अधिकारी यांसह घटनेशी संबंधित अन्य व्यक्तींचा जबाब नोंदवण्यात येत आहे. जबाबात घटना घडल्याबाबतची हकीकत वेगवेगळी सांगितली जात असल्याचे मुंबई लोहमार्ग पोलिस आयुक्त राकेश कलासागर यांनी सांगितले.मुंबई रेल्वे पोलिसांच्या सहायक पोलिस आयुक्तांच्या नेतृत्वाखाली मुंब्रा घटनेचा तपास सुरू आहे. लवकरात लवकर तपास पूर्ण करण्याचा प्रयत्न आहे, असेही रेल्वे पोलिस आयुक्त राकेश कलासागर यांनी सांगितले. कुर्ला कारशेडमध्ये तपासणीसाठी आणलेली कसारा-सीएसएमटी मार्गावरील लोकल गाडी सुस्थितीत असल्याचे तपासणीअंती दिसून आले. डब्यांचे सस्पेंशन आणि डब्यांवरील ओरखड्याबाबत सविस्तर तपास सुरू आहे, असे रेल्वे अधिकाऱ्यांकडून सांगण्यात आले.