भुसावळ शहरात ग्लिरिसिडिया ‘उंदीर मारी’ झाडांचा बहर; निसर्गप्रेमींच्या नजरा खिळल्या .

उन्हाळ्याच्या भर उन्हातही निसर्ग आपली रंगसंगती विसरत नाही, याचा प्रत्यय भुसावळ शहरात रेल्वे हॉस्पिटलजवळील रस्त्यावर ग्लिरिसिडिया (स्थानिक नाव: उंदीर मारी) या झाडांच्या मोहक फुलांनी आलेल्या बहारातून येतो. गुलाबी-पांढऱ्या फुलांनी बहरलेले हे झाड सध्या परिसरातील आकर्षणाचा केंद्रबिंदू ठरत आहे.
ग्लिरिसिडिया हे झाड जलद वाढणारे, नत्र साठवणारे व पर्यावरणस्नेही असून शेतकऱ्यांसाठी तसेच पर्यावरणप्रेमींसाठी उपयुक्त मानले जाते.

शेतीच्या सीमारेषांवर कुंपणासाठी, हिरवळीच्या खतासाठी आणि कीटकनाशक म्हणून याचा उपयोग केला जातो. याच्या वासामुळे उंदीर दूर पळतात, म्हणून याला उंदीर मारी असे नाव प्राप्त झाले आहे. पर्यावरण तज्ज्ञांकडून नोंद : – या झाडाचा बहार टिपण्यासाठी पर्यावरण तज्ज्ञ प्रा. के. पी. चौधरी यांनी फुलगाव येथून भुसावळ शहरातील प्रभाकर हॉल येथे विवाहप्रसंगी येताना, रेल्वे हॉस्पिटलजवळील झाडाचे छायाचित्र टिपले. त्यांच्यासमवेत एन. ए. देशमुख पर्यवेक्षक गं . सां. चौधरी विद्यालय वरणगांव हे उपस्थित होते. पर्यावरणासाठी वरदान : -हे झाड जमिनीत नत्र वाढवते, मातीची धूप थांबवते आणि मधमाशा, फुलपाखरांना आकर्षित करते. याचा बहर फक्त सौंदर्यासाठी नव्हे, तर जैवविविधतेसाठीही अत्यंत उपयुक्त आहे.निसर्गाच्या या रंगीबेरंगी भेटीमुळे भुसावळ शहरात एक आल्हाददायक अनुभव मिळत आहे. नागरिकांनीही याची जपणूक करावी, असे आवाहन पर्यावरणप्रेमी प्रा के पी चौधरी करत आहेत. फुलगांव ग्रामपंचायत परिसरात हा वृक्ष आहे पण अजून फुलबहर येण्या एवढी पुरेसी वाढ झाली नाही .