Rajendra Nikam
बिहारमधील विरोधी पक्षनेते तेजस्वी यादव यांच्या ताफ्यातील दोन वाहनांना भरधाव ट्रकने दिलेल्या धडकेत तीन पोलिस जखमी झाल्याची घटना बिहारच्या वैशाली जिल्ह्यात शनिवारी घडली. राष्ट्रीय जनता दलाचे नेते आणि बिहारमधील विरोधी पक्षनेते तेजस्वी यादव यांच्या ताफ्यातील दोन वाहनांना भरधाव ट्रकने दिलेल्या धडकेत तीन पोलिस जखमी झाल्याची घटना बिहारच्या वैशाली जिल्ह्यात शनिवारी घडली. या घटनेत तेजस्वी यादव थोडक्यात बचावले.
तेजस्वी यांचा ताफा मधेपुरा येथून पाटण्याला परतत असताना ही घटना घडली. हा ताफा पाटणा-मुझफ्फरपूर राष्ट्रीय महामार्गावर गोराउलजवळ चहासाठी थांबला असताना, मध्यरात्रीनंतर १२.३० वाजता हा अपघात झाला. ‘या अपघातात तेजस्वी यादव थोडक्यात बचावले. तीन सुरक्षारक्षक जखमी झाले असून, त्यांना जवळच्या सरकारी रुग्णालयात नेण्यात आले. त्यांची प्रकृती स्थिर आहे. यादव यांनी या रुग्णालयाला भेट देऊन जखमींची विचारपूस केली,’ असे एका पोलिस अधिकाऱ्याने सांगितले.‘अपघातानंतर मी जिल्हा पोलिसांना, प्रशासनाला तात्काळ कळवले. हा अपघात माझ्या गाडीपासून अवघ्या पाच फूट अंतरावर झाला. वाहतुकीच्या नियमांचा भंग करणाऱ्यांवर कारवाई व्हायला हवी,’ असे यादव यांनी रुग्णालयात पत्रकारांशी बोलताना सांगितले. पोलिसांनी ट्रकचालकासह त्याच्या मदतनीसाला अटक करून, ट्रक ताब्यात घेतला. प्रकरणाची चौकशी सुरू आहे.तेजस्वी यांच्या सुरक्षेबाबत स्थानिक प्रशासनाने निष्काळजी केल्याचा आरोप तेजस्वी यांच्या भगिनी रोहिणी आचार्य यांनी ‘एक्स’वरून केला. ‘ताफ्याच्या मध्यभागी असलेल्या तेजस्वी यांच्या कारजवळ ट्रक कसा पोहोचला? तेजस्वी यांना धोका पोहोचवण्याचा हेतू होता का? तेजस्वीबाबत अशा घटना यापूर्वीही घडल्या आहेत,’ असे म्हणत त्यांनी चौकशीची मागणी केली.
