Rajendra Nikam
ठाकरे बंधूंच्या मनोमिलनाची चर्चा सुरू आहे. राज ठाकरेंनी उद्धव ठाकरें सोबतचे मतभेद संपल्याचे संकेत दिले. उद्धव ठाकरेंनी देखील सकारात्मक प्रतिसाद दिला. दोन्ही नेत्यांच्या प्रतिक्रियांमुळे युतीच्या चर्चांना उधाण आले आहे. शिंदे गटाचे नेते गजानन कीर्तीकर यांनी या निर्णयाचे स्वागत केले आहे. बाळासाहेबांची शिवसेना परत एकत्र यावी, अशी इच्छा त्यांनी व्यक्त केली. मात्र, कीर्तीकरांना यावेळी निवडणुकीचे तिकीट नाकारण्यात आले.मुंबई: गेल्या महिन्याभरापासून ठाकरे बंधूंच्या मनोमिलनाची चर्चा जोरात सुरु आहे. मनसे प्रमुख राज ठाकरेंनी एप्रिलच्या अखेरीस दिलेल्या मुलाखतीत उद्धव ठाकरेंसोबतच्या मतभेदासंदर्भात बोलताना एक सकारात्मक विधान केलं. आमचे वाद, भांडणं महाराष्ट्रापेक्षा मोठी नाहीत, असं राज ठाकरे म्हणाले. त्यावर पुढच्या काही तासांत उद्धव ठाकरेंची प्रतिक्रिया आली. आमच्यात वाद, मतभेद तसे नव्हतेच. काही असलेच, तर आज ते संपले. महाराष्ट्राच्या हितासाठी एकत्र या, अशी साद उद्धव यांनी घातली. त्यानंतर दोन्ही पक्षाच्या नेत्यांच्या प्रतिक्रिया येण्यास सुरुवात झाली.
मागील काही दिवसांपासून शिवसेना उबाठा आणि मनसेचे नेते संभाव्य युतीसंदर्भात सकारात्मक बोलत आहेत. विशेष म्हणजे सुरुवातीला युतीच्या विरोधात सूर लावणाऱ्या मनसेच्या नेत्यांची भूमिका आता बदलली आहे. त्यांनी सकारात्मक विधानं सुरु केली आहेत. शिंदे यांच्या शिवसेनेनं या सगळ्यावर सावध पवित्रा घेतला आहे. ठाकरे बंधू एकत्र आल्यास मुंबई महापालिका निवडणुकीत सर्वाधिक नुकसान शिंदेसेनेचं होण्याची शक्यता आहे. शिंदेसेनेचे माजी खासदार गजानन कीर्तीकर यांनी ठाकरे बंधूंच्या मनोमिलनावर प्रतिक्रिया दिली आहे. विशेष म्हणजे कीर्तीकर ठाकरे बंधूंच्या एकत्र येण्याच्या चर्चेवर सकारात्मक बोलले आहेत.’उद्धव आणि राज ठाकरे एकत्र यावेत ही इच्छा महाराष्ट्रातील असंख्य शिवसैनिकांची आहे. बाळासाहेबांच्या हृयातीत त्यांनीही दोघांना सोबत आणण्याचा प्रयत्न कसोशीनं केला. बाळासाहेबांची कडवट, भव्यदिव्य शिवसेना या महाराष्ट्रात परत अवतरायची असेल तर एकनाथ शिंदेसुद्धा यांच्यासोबत आले पाहिजेत, असं माझं प्रामाणिक मत आहे,’ असं कीर्तीकर म्हणाले.शिवसेनेत उभी फूट पडल्यानंतर ४० आमदारांनी शिंदेंना साथ दिली. त्यानंतर बहुतांश खासदारदेखील शिंदेसोबत गेले. कीर्तीकर सर्वात उशिरा शिंदेसेनेत दाखल झाले. पक्षफुटीनंतर ते ठाकरेंच्या काही कार्यक्रमांना, मेळाव्यांना उपस्थित होते. पण अखेर त्यांनी शिंदेसेनेची वाट धरली. विशेष म्हणजे त्यांचं कुटुंब ठाकरेंसोबत कायम राहिलं. आपण कुटुंबाच्या विरोधात जाऊन पक्षांतराचा निर्णय घेतल्याचं कीर्तीकर यांनी सांगितलं होतं. शिंदेसेनेत गेलेल्या कीर्तीकर यांचं तिकीट पक्षानं कापलं. त्यांच्या जागी लोकसभा निवडणुकीच्या तोंडावर पक्षात आलेल्या रविंद्र वायकरांना संधी दिली.
