सावकाराच्या जाचाला कंटाळून शेतमजुराने संपवलं जीवन; मृत्यूपूर्वी चिट्टीत मारहाणीसह पैशांच्या त्रासाचा उल्लेख.

संतप्त नातेवाइकांनी शवविच्छेदनानंतर मजुराचा मृतदेह थेट मलकापूर शहर पोलिस ठाण्यात नेला. गुन्हे दाखल करून आरोपीस अटक होईपर्यंत मृतदेह उचलणार नसल्याचे ठणकावले.अवैध सावकाराच्या जाचाला कंटाळून धरणगाव येथील एका शेतमजुराने विषप्राशन करून आत्महत्या केली. आत्महत्येपूर्वी चिठ्ठी लिहून सावकाराने केलेली मारहाण, पैशांचा व्यवहार व परतफेड केलेल्या रकमेचा उल्लेख केल्याने संतप्त नातेवाइकांनी शवविच्छेदनानंतर मजुराचा मृतदेह थेट मलकापूर शहर पोलिस ठाण्यात नेला. गुन्हे दाखल करून आरोपीस अटक होईपर्यंत मृतदेह उचलणार नसल्याचे ठणकावले. अखेर पोलिसांनी सावकारी प्रतिबंधक कायद्यानुसार गुन्हा दाखल केला.

धरणगावयेथील शिवाजी घुगरे (४२) यांनी गावातीलच अभिषेक सुनील कापसे याच्याकडून सहा हजार रुपये व्याजाने घेतले होते. व्याजाची रक्कम वसूल करण्यासाठी कापसे याने तगादा लावला होता. ४० हजार रुपयांची परतफेड करण्यात आली. तरीही कापसे अधिकची रक्कम मागत होता. ३ जूनच्या रात्री शिवाजीच्या घरी येऊन कापसे याने त्यांना बाहेर बोलावले आणि १ लाख २० हजार रुपये मागत मारहाण केली.काही नागरिकांसमक्ष मारहाण झाल्याची बाब घुगरे यांना जिव्हारी लागली. त्यातच जीवे मारण्याच्या धमक्या दिल्या. यामुळे हतबल झालेल्या घुगरे यांनी ४ जून रोजी विषारी औषध प्राशन केले. प्रकृती गंभीर असल्याने त्याला पुढील उपचारासाठी बुलढाणा जिल्हा रुग्णालयात भरती करण्यात आले. गुरुवारी उपचारादरम्यान त्यांचा मृत्यू झाला.

मी शिवाजी सुपडा घुगरे. मन:पूर्वक चिठ्ठी लिहितो की, मी अभिषेक कापसेकडून सहा हजार रुपये घेतले होते. मी याची परतफेड ४० हजार रुपये केली. नंतर तो मला अजून पैसे मागायचा. मी त्याला पैसे दिले नाही. तो काल रात्री माझ्या घराकडे आला अन् मला घरातून बोलावून रामदास पाटील यांच्या घरासमोर मारले. रामदास पाटील, मंगेश थोरात, सुनील नेरकर, सुनील ढोले, अमित सोनटक्के हे सर्व घटनास्थळी उभे होते. अभिषेकने मला काल पैसे दे नाही तर मारून टाकेन ही धमकी दिली. याच कारणाने मी आत्महत्या करीत आहे’, असे घुगरे यांनी आत्महत्येपूर्वी लिहिलेल्या चिठ्ठीत म्हटले आहे.