जे सोडून गेले ते… उद्धव ठाकरेंनी चंग बांधला, ‘मातोश्री’वरुन आदेश निघाले, आता गद्दारांच्या विरोधात…

गेल्या अनेक दिवसांपासून उद्धव ठाकरे आणि राज ठाकरे यांच्या एकत्र येण्याबाबत सुरू असलेल्या चर्चेत शुक्रवारी आणखी एक भर पडली. उद्धव ठाकरे यांनी याबाबत केलेल्या वक्तव्यानंतर शुक्रवारी दिवसभर चर्चेचा नवा अध्याय रंगला ‘जे सोडून गेले ते आपले कधी नव्हतेच, जे आहेत त्यांना सोबत घ्या आणि गद्दारांविरोधात वज्रमूठ उभारून शिवसेनेला गतवैभव प्राप्त करून द्या, असे आवाहन शिवसेना बाळासाहेव ठाकरे पक्षाचे प्रमुख उद्धव ठाकरेंनी केले. आगामी महापालिका, जिल्हा परिषदेच्या निवडणुकांमध्ये शिवसेनेचा भगवा फडकवण्यासाठी ताकद पणाला लावण्याच्या सूचनाही त्यांनी पदाधिकाऱ्यांना केल्या.शिवसेना ठाकरे गटाच्या उपनेतेपदी निवड झाल्यानंतर दत्ता गायकवाड यांच्यासह नाशिकच्या पदाधिकाऱ्यांनी शुक्रवारी (दि. 6) ‘मातोश्री’ ची वारी करीत पक्षप्रमुखांची भेट घेतली. खासदार संजय राऊत हेही यावेळी उपस्थित होते. यावेळी उद्धव ठाकरे यांनी नाशिकचा हालहवाल जाणून घेतला.

भाजप नेते तथा जलसंपदामंत्री गिरीश महाजन यांची ‘उबाठा’ला जमीनदोस्त करण्याची भाषा, सुधाकर बडगुजर यांनी मुख्यमंत्री देवेंद्र फडणवीस यांची घेतलेली भेट आणि त्यानंतर व्यक्त केलेली नाराजी, त्यानंतर त्यांची पक्षाकडून करण्यात आलेली हकालपट्टीची कारवाई यावर कटाक्ष टाकताना नवनियुक्त उपनेते गायकवाड यांना जबाबदारीची जाणीवही ठाकरे यांनी करून दिली.”जे सोडून गेले ते आपले कधीच नव्हते. जे आहेत त्यांना सोबत घ्या, जुन्या-नव्यांची सांगड घाला आणि पक्षसंघटन मजबूत करा. महापालिका, जिल्हा परिषद, पंचायत समित्यांच्या निवडणुकाच्या तयारीला लागा, असे आवाहन ठाकरे यांनी केले. यावेळी उपनेते सुनील बागूल, जिल्हाप्रमुख डी. जी. सूर्यवंशी, माजी आमदार वसंत गीते, कोअर कमिटी सदस्या भारती ताजनपुरे, राहुल ताजनपुरे, उपजिल्हाप्रमुख सचिन मराठे, महेश बडवे, अस्लम मनियार, मसुद जिलानी, बाळा दराडे, सरप्रीतसिंग बल, दीपक गामणे, भूषण भामरे, विक्रम घुगे, सचिन गिते आदी उपस्थित होते.

दरम्यान, गेल्या अनेक दिवसांपासून उद्धव ठाकरे आणि राज ठाकरे यांच्या एकत्र येण्याबाबत सुरू असलेल्या चर्चेत शुक्रवारी आणखी एक भर पडली. उद्धव ठाकरे यांनी याबाबत केलेल्या वक्तव्यानंतर शुक्रवारी दिवसभर चर्चेचा नवा अध्याय रंगला. ‘जे काही बारकावे आहेत, ते आम्ही पाहत आहोत. बघूया, जे महाराष्ट्रातील जनतेच्या मनात आहे, ते होईल’, असे सूचक वक्तव्य उद्धव ठाकरे यांनी मुंबईत केले.शिवसेनेच्या महिला पदाधिकारी सुजाता शिंगाडे या शुक्रवारी स्वगृही अर्थात शिवसेना (उबाठा) पक्षात परतल्या. त्यावेळी ‘मातोश्री’वर पक्षप्रमुख उद्धव ठाकरे यांनी त्यांचे पक्षात स्वागत केले. त्यावेळी पत्रकारांशी संवाद साधताना उद्धव ठाकरे यांनी वरील वक्तव्य केले.