८४ व्या वर्षी नवी राजकीय इनिंग; नगर जिल्ह्यातील आक्रमक नेता उद्या शिंदेंच्या शिवसेनेत प्रवेश करणार.

श्रीरामपूरचे माजी आमदार भानुदास मुरकुटे आता शिवसेनेत प्रवेश करणार आहेत. तेलंगणाचे माजी मुख्यमंत्री चंद्रशेखर राव यांच्या भारत राष्ट्र समिती (बीआरएस) पक्षात ते होते. उपमुख्यमंत्री एकनाथ शिंदे यांच्या नेतृत्वाखाली ते शिवसेनेत प्रवेश करतील. त्यांच्यासोबत श्रीरामपूरचे माजी उपनगराध्यक्ष संजय छल्लारे सुद्धा शिवसेनेत प्रवेश करणार आहेत.विजयसिंह होलम, अहिल्यानगर : आतापर्यंत बहुतांश पक्षांत फिरून आलेले, आक्रमक नेते असे ओळख असलेले श्रीरामपूरचे माजी आमदार भानुदास मुरकुटे आता वयाच्या ८४ व्या वर्षी नवी राजकीय इनिंग खेळण्यासाठी सज्ज झाले आहेत. तेलंगणचे माजी मुख्यमंत्री चंद्रशेखर राव यांच्या भारत राष्ट्र समिती (बीआरएस) पक्षात असलेले मुरकुटे शनिवारी (७ जून) उपमुख्यमंत्री एकनाथ शिंदे यांच्या नेतृत्वाखालील शिवसेनेत प्रवेश करणार आहेत. पक्षाचे नेते, मंत्री शंभूराज देसाई शनिवारी नगरला येत आहेत. त्यांच्या उपस्थितीत यावर शिक्कामोर्तब होणार असल्याचे सांगण्यात आले. विधानसभा निवडणुकीत महायुतीत वेळीच समन्वय न झाल्याने शिवसेना आणि राष्ट्रवादीला येथे पराभव पत्काराव लागला होता.

त्यानंतर आता शिंदेंच्या शिवसेनेनं श्रीरामूपरमध्ये ताकद वाढवण्यास सुरुवात केल्याचे दिसून येते.माजी आमदार भानुदास मुरकुटे अहिल्यानगर जिल्ह्याच्या राजकारणातील महत्त्वाचे नेते मानले जातात. श्रीरामपूरचे ते वेगवेगळ्या पक्षाकडून तीन वेळा आमदार होते. अशोक सहकारी साखर कारखान्याचे ते अध्यक्ष आहेत. जिल्हा मध्यवर्ती सहकारी बँकेच्या संचालकपदासह इतरही सहकारी संस्थांवर त्यांनी काम केले आहे. त्यांची राजकारणाची सुरुवात काँग्रेसपासून झाली. त्यानंतर ज्येष्ठ नेते शरद पवार यांनी राष्ट्रवादी काँग्रेसची स्थापना केल्यावर सुरुवातीपासूनच मुरकुटे राष्ट्रवादी काँग्रेसमध्ये गेले.

एकत्रित शिवसेना असताना त्यांनी शिवसेनेतही प्रवेश केला होता. शिवसेनेकडून त्यांनी लोकसभेची निवडणूकही लढविली, मात्र त्यांना अपयश आले होते. काही काळापूर्वी महाराष्ट्रात सक्रीय झालेल्या बीआरएसमध्ये त्यांनी प्रवेश केला. त्या पक्षानेही त्यांच्यावर मोठी जबाबदारी सोपविली होती. मात्र, पुढे या पक्षाला मोठा सेटबॅक बसला. त्यामुळे मुरकुटे पुन्हा योग्य संधीच्या शोधात होते. आता मुरकुटे आणि श्रीरामपूरचे माजी उपनगराध्यक्ष संजय छल्लारे शनिवारी शिंदे यांच्या शिवसेनेत प्रवेश करणार आहेत. संजय छल्लारे यांनी काँग्रेसमधून बाहेर पडत उद्धव ठाकरे यांच्या नेतृत्वाखालील शिवसेना उद्धव बाळासाहेब ठाकरे पक्षात प्रवेश केला होता. त्यांच्यावर श्रीरामपूर शहराध्यक्षपदाची जबाबदारीही सोपवण्यात आली होती. मात्र, स्थानिक राजकारणात मतभेद झाल्याने त्यांनीही मुरकुटे यांच्यासोबत शिंदेंच्या शिवसेनेत प्रवेशाचा निर्णय घेतला आहे. त्यामुळे स्थानिक स्वराज्य संस्थांच्या निवडणुकीत श्रीरामपूरच्या राजकारणातील गणिते बदलणार आहेत.मुरकुटे हे आक्रमक नेते म्हणून ओळखले जातात. सहकार आणि अन्य राजकारणातून त्यांनी ज्येष्ठ नेते राधाकृष्ण विखे पाटील, ज्येष्ठ नेते बाळासाहेब थोरात, त्यांच्यापूर्वी दिवंगत नेते बाळासाहेब विखे पाटील यांच्यावरही वेळोवेळी टीका केलेली आहे. अनेक आक्रमक आंदोलने त्यांनी केली. यासाठी त्यांना तुरुंगवासही भोगावा लागला. याशिवाय इतरही गुन्ह्यांमध्ये अडकण्याची आणि अटक होण्याची वेळ त्यांच्यावर आली होती. तरुणपणापासून ते राजकारणात सक्रीय आहेत. विविध संस्था उभ्या केल्या, त्या चालविल्या, इतर संस्थांमध्ये काम केले. आता वयाच्या ८४ व्या वर्षीही ते राजकारणात सक्रीय आहेत. या वयातही नव्या पक्षाच्या माध्यमातून राजकारण करण्यासाठी ते सज्ज झाले आहेत. आता महायुती म्हणून त्यांना विखे पाटील यांच्याशी जुळवून घ्यावे लागणार आहे. त्यामुळे भविष्यात श्रीरामपूरचे राजकारण कसे असेल? यासंबंधी जिल्ह्यात उत्सुकता निर्माण झाली आहे.