मुलीची छेड काढण्यावरुन वाद, वडिलांवर दोघांचा हल्ला, कुटुंबीय पोहोचेपर्यंत सारं संपलेलं.

 पुण्यातील खेड येथे एका व्यक्तीची अत्यंत निर्घृणपणे हत्या करण्यात आली आहे. मुलीची छेड काढण्याच्या वादातून ही घटना घडल्याची माहिती आहे.मुलीची छेड काढणाऱ्या तरुणाशी झालेल्या वादातून एका 40 वर्षीय व्यक्तीवर कोयत्याने हल्ला करून त्याचा खून करण्यात आला आहे. खेड तालुक्यातील कडूस येथे ही धक्कादायक घटना घडली आहे.संतोष बबन ढमाले (वय 40) असे हत्या झालेल्या व्यक्तीचे नाव असल्याची माहिती आहे. मंगळवारी (3 जून) रात्री साडेदहा वाजण्याच्या सुमारास ही भयंकर घटना घडल्याचं सांगितलं जात आहे.

या प्रकरणी खेड पोलिसांनी दोन आरोपींविरुद्ध गुन्हा दाखल केला आहे. या घटनेमुळे कडूस परिसरात तणावाचे वातावरण निर्माण झाले आहे.याबाबत मिळलेल्या अधिक माहितीनुसार, मृत संतोष बबन ढमाले आणि त्यांचा मित्र अशोक झांबर गारगोटे हे चेतन बारमधून दारू पिऊन बाहेर पडले होते. यावेळी बारसमोर उभे असताना आरोपी किरण शिवाजी खंडागळे आणि प्रणय प्रमोद नवले (दोघेही राहणार कडूस येथील) यांच्याशी संतोष यांचा वाद उफाळला.यापूर्वी प्रणय याने संतोष यांच्या मुलीची छेड काढली होती. त्यामुळे हा वाद अधिक तीव्र झाला. वादाचे पर्यवसन हिंसक हल्ल्यात झाले. दोन्ही आरोपींनी कोयत्याने संतोष यांच्या डोक्यावर आणि तोंडावर वार केले, यामध्ये संतोष ढमाले हे गंभीर जखमी झाले. जखमी झालेले संतोष ढमाले रक्तबंबाळ होऊन जमिनीवर कोसळले. त्यांना रक्ताच्या थारोळ्यात पडलेलं पाहून अशोक झांबर घाबरले आणि तिथून पळून गेले. ते संतोष यांच्या घरी गेले. कुटुंबीयांना याची माहिती दिली आणि कुटुंबीयांना घेऊन ते घटनास्थळी परतले. तेव्हा कुटुंबीयांना संतोष हे रक्ताच्या थारोळ्यात पडलेले आढळले. कुटुंबीयांनी संतोष यांना तातडीने चाकण येथील युनिकेअर हॉस्पिटलमध्ये दाखल केले. परंतु डॉक्टरांनी त्यांना तपासून मृत घोषित केले.अशोक यांच्या तक्रारीवरून खेड पोलिसांनी भा. द. वि. सं. 103(1), 3(5) आणि शस्त्र अधिनियम 4(25) अंतर्गत गु. नं. 325/2025 दाखल केला आहे. पोलिसांनी आरोपींविरुद्ध कठोर कारवाईचे संकेत दिले आहेत. या घटनेमुळे कडूस गावात तणाव निर्माण झाला असून, पोलीस परिस्थितीवर लक्ष ठेवून आहेत.