फ्लॅटमधून तीव्र दुर्गंधी, दाराबाहेर 3 दिवसांचे पेपर, आत जाऊन पाहताच सारे हादरले, भाऊ-बहीण…

फ्लॅटमधून तीव्र दुर्गंधी, दाराबाहेर 3 दिवसांचे पेपर, आत जाऊन पाहताच सारे हादरले, भाऊ-बहीण… एका घरात भाऊ आणि बहीण यांचे मृतदेह गळफास घेतलेल्या अवस्थेत आढळून आले आहेत. दिल्लीच्या शहादरा जिल्ह्यातील दिलशाद गार्डन परिसरात ही धक्कादायक घटना घडली आहे. त्यांच्या फ्लॅटमधून खूप दुर्गंधी येत होती. त्यामुळे शेजाऱ्यांनी पोलिसांना याबाबतची माहिती दिली. माहिती मिळताच पोलिसांनी घटनास्थळी धाव घेतली. सीमापुरी पोलीस स्टेशनच्या पोलिसांनी अग्निशमन दलाच्या मदतीने फ्लॅटचा दरवाजा तोडला आणि आत जाऊन पाहिलं तर दोन व्यक्ती गळफास घेतलेल्या अवस्थेत दिसून आले. पोलिसांनी दोघांचेही मृतदेह ताब्यात घेतले आणि ते शवविच्छेदनासाठी पाठवले. वीरेश कुमार तोमर (वय 32) आणि प्रीती उर्फ चिंकी (वय 30) अशी मृतांची नावे आहेत.याप्रकरणी डीसीपी प्रशांत गौतम यांनी दिलेल्या माहितीनुसार, “शवविच्छेदन अहवाल आल्यानंतरच त्यांच्या मृत्यूचे नेमके कारण कळू शकेल.” पोलिसांना घटनास्थळी कोणतीही सुसाइड नोट सापडलेली नाही. DCP गौतम यांच्या माहितीनुसार, वीरेशच्या खोलीतून रविवारी सकाळी साडे सात वाजताच्या सुमारास उग्र वास येत होता. वीरेशच्या वरच्या मजल्यावर राहणाऱ्या अशोक सिंह यांनी पोलिसांना याबद्दल माहिती दिली. बातमी मिळताच पोलीस घटनास्थळी पोहोचले. या फ्लॅटचा दरवाजा आतून बंद होता. पोलिसांनी अग्निशमन दलाला बोलावले. त्यांनी दरवाजा तोडला. आत दोन्ही मृतदेह कुजलेल्या अवस्थेत गळफास घेतलेले आढळले.

पोलिसांनी क्राइम ब्रँच आणि फॉरेन्सिक टीमला बोलावले. मृतांच्या शरीरावर कोणत्याही जखमा नव्हतया. तर, दोन्ही मृतदेह कुजलेल्या अवस्थेत होते. सध्या सीमापुरी पोलीस स्टेशनचे पोलीस या प्रकरणाचा तपास करत आहे.मिळालेल्या माहितीनुसार, वीरेश आणि प्रीती 2021 पासून दिल्लीत राहत होते. ते दोघे दिलशाद गार्डनच्या D-409 या फ्लॅटमध्ये तळमजल्यावर राहत होते.

याआधी ते झिलमिलमध्ये राहायचे. पोलीस सूत्रांनी दिलेल्या माहितीनुसार, खोलीच्या बाहेर तीन दिवसांचे वर्तमानपत्र पडलेले आढळले. त्यामुळे तीन दिवसांपासून हे दोघेही घराबाहेर पडले नसावे, असा अंदाज आहे. त्यामुळे दोघांनी तीन दिवसांपूर्वी आत्महत्या केली असावी, असा संशय आहे. रविवारी (1 जून) सकाळी तीव्र दुर्गंधी येऊ लागल्याने वरच्या मजल्यावर राहणाऱ्या अशोक सिंह यांनी पोलिसांना फोन केला.ते दोघेही मूळचे बागपतचे होते. वीरेश आणि प्रीतीचे नातेवाईक विकास तोमर यांनी सांगितले की, त्यांना कोणतीही आर्थिक अडचण नव्हती. पण, त्यांनी आपल्या आयुष्याची अखेर का याचं कारण कळत नाहीये. वीरेशचे वडील देवेंद्र तोमर सैन्यात होते. त्यांचे 2011 मध्ये निधन झाले. त्यानंतर 2021 मध्ये त्यांच्या आई अनिता यांचेही आजारामुळे निधन झाले. आईच्या मृत्यूनंतर दोघे भाऊ-बहीण दिल्लीला आले. कुटुंबाच्या माहितीनुसार, प्रीती MBA चा अभ्यास करत होती, तर वीरेश एका प्रायव्हेट कंपनीत IT चे काम करत होता.यांचे शेजारी आकाशने सांगितलं की, वीरेश आणि प्रीती कोणाशीही जास्त बोलत नसत. ते घरातच राहायचे. त्यांच्या घराचा दरवाजा नेहमी बंद असायचा. त्यांची कोणाशीही ओळख नव्हती. आम्हाला त्यांची नावेसुद्धा माहीत नव्हती. घटनेची माहिती मिळताच बागपतहून काही नातेवाईक सीमापुरी पोलीस स्टेशनमध्ये आले होते. त्यांनी सांगितले की, वीरेश आणि प्रीती गेल्या 10-12 वर्षांपासून त्यांच्या नातेवाईकांच्या संपर्कात नव्हते. ते कुटुंबातील कोणत्याही कार्यक्रमात येत नव्हते.कुटुंबियांनी वीरेशला प्रीतीच्या लग्नाबद्दल विचारले होते. पण प्रीतीने नकार दिला होता. तिला अजून शिक्षण घ्यायचे होते, असे तिने सांगितले होते. वरच्या मजल्यावर राहणाऱ्या अशोकने सांगितले की, गेल्या पाच वर्षांत त्यांनी प्रीतीला दोन-तीन वेळा खिडकीतून जेवण बनवताना पाहिले होते. बहुतेक वेळा ते दोघे बाहेरूनच ऑनलाईन सामान मागवायचे. या घटनेमुळे परिसरात खळबळ उडाली आहे. पोलीस या प्रकरणाचा कसून तपास करत आहेत. भाऊ-बहिणीने आत्महत्या का केली, याचे कारण अद्याप स्पष्ट झालेले नाही.