Rajendra Nikam
सर्वानुमते ठरलं ! अशी जाहीर पोस्ट करत राष्ट्रवादी शरद पवार गटाचे माजी आमदार बाबाजानी दुर्राणी यांनी उपमुख्यमंत्री अजित पवारांच्या राष्ट्रवादी काँग्रेसमध्ये येत्या आठ जूनला प्रवेश करणार असल्याचे जाहीर केले आहे. काल पाथरी विधानसभा मतदारसंघातील आणि जिल्ह्यातील शेकडो प्रमुख कार्यकर्त्यांच्या उपस्थितीत पाथरी येथे बैठक संपन्न झाली. आणि या बैठकीमध्ये सर्वांनी आपापली मते मांडली. येणाऱ्या निवडणुकीच्या पार्श्वभूमीवर आणि राजकीय वाटचाली संदर्भात चर्चा झाली आणि यावेळेस सर्वांमध्ये राज्याचे लोकप्रिय उपमुख्यमंत्री अजित पवार यांच्या नेतृत्वात राष्ट्रवादी काँग्रेसमध्ये प्रवेश करण्याचे निश्चित झाले आहे. असे म्हणत माजी आमदार बाबाजानी दुर्राणी यांनी शरद पवारांची साथ सोडण्याचे निश्चित केले आहे. राज्यामध्ये शरद पवारांना सोडून त्यांचे शिलेदार अजित पवारांकडे जात आहेत.माजी आमदार बाबाजींनी दुर्राणी यांनी राष्ट्रवादी काँग्रेसमध्ये फूट पडल्यानंतर सुरुवातीला अजित पवार गटात जाण्याचा निर्णय घेतला होता. सुरुवातीला अजित पवार यांच्यासोबत जिल्ह्यामध्ये पक्षाची धुरा देखील सांभाळली. पण झालेल्या लोकसभा निवडणुकीच्या पार्श्वभूमीवर बाबाजानी दुरानी यांनी शरद पवारांकडे जाण्याचा निर्णय घेतला.
लोकसभा निवडणुका झाल्यानंतर पुन्हा विधानसभा 2025 निवडणुकीच्या वेळी बाबाजानी दुर्राणी यांना राष्ट्रवादी शरद पवार गटाकडून पाथरी विधानसभा मतदारसंघातून उमेदवारी मिळेल अशी अपेक्षा होती. पण पाथरी विधानसभा मतदारसंघात काँग्रेसचे आमदार सुरेश वरपूडकर हे प्रतिनिधित्व करत असल्याने महाविकास आघाडीमध्ये पाथरी विधानसभा मतदारसंघाची जागा काँग्रेसकडेच राहिली. त्यामुळे नाराज होऊन माजी आमदार बाबाजानी दुर्राणी यांनी पाथरी विधानसभा मतदारसंघातून अपक्ष निवडणूक लढवली आणि त्यांना पराभवाला सामोरे जावे लागले.येणाऱ्या आठ जून रोजी पाथरी येथे भव्य असा कार्यकर्ता मेळावा संपन्न होणार आहे. या मेळावाला खुद्द राष्ट्रवादी काँग्रेस पक्षाचे अध्यक्ष आणि उपमुख्यमंत्री अजित पवार हे उपस्थित राहणार असून त्यांच्या उपस्थितीत माजी आमदार बाबाजानी दुर्राणी आणि त्यांचे सर्व समर्थक राष्ट्रवादी काँग्रेसमध्ये प्रवेश करणार आहेत. बाबाजानी दुरानी यांचा अजित पवारांकडे जाण्याचा निर्णय हा शरद पवार गटाला मोठा धक्का मानला जात आहे. परभणी जिल्ह्यामध्ये राष्ट्रवादी काँग्रेस वाढविण्याचे काम माजी आमदार बाबाजानी दुर्राणी यांनी केले आहे. त्यांच्या जिल्हाध्यक्ष पदाच्या काळात परभणी जिल्ह्यामध्ये राष्ट्रवादी काँग्रेस ही मोठ्या प्रमाणावर वाढली आहे.
अजित पवार गटाकडे दुर्राणी गेल्यामुळे आता जिल्ह्यामध्ये अजित पवारांची राष्ट्रवादी ही मजबूत होताना दिसत आहे. तर दुसरीकडे शरद पवारांच्या राष्ट्रवादीची ताकद कमी होताना दिसत आहे.माजी आमदार बाबाजानी दुर्राणी हे राष्ट्रवादी काँग्रेसचा अल्पसंख्यांक चेहरा म्हणून सुप्रसिद्ध आहेत.राष्ट्रवादी काँग्रेसची स्थापना झाल्यापासून बाबाजानी दुरानी हे शरद शरद पवार यांच्यासोबत एकनिष्ठ राहिले. बाबाजानी दुर्राणी यांनी पाथरी नगरपरिषदेचे सदस्य म्हणून राजकीय कारकीर्द सुरू केली. त्यानंतर ते पाथरी नगर परिषदेचे अध्यक्ष आणि वक्त बोर्डाचे सदस्य झाले. 2004 च्या महाराष्ट्र विधानसभा निवडणुकीत त्यांनी पाथरी विधानसभा मतदारसंघांमधून राष्ट्रवादी काँग्रेसचे उमेदवार म्हणून निवडणूक जिंकली. 2012 मध्ये परभणी हिंगोली स्थानिक प्राधिकरण मतदार संघातून ते महाराष्ट्र विधानसभेचे सदस्य म्हणून निवडून आले होते. त्यानंतर पुन्हा एकदा त्यांची 2018 मध्ये महाराष्ट्र विधान परिषदेच्या सदस्य पदी बिनविरोध निवड झाली. 2024 मध्ये त्यांच्या विधान परिषदेचा कार्यकाळ संपला. नुकत्याच झालेल्या विधानसभा निवडणुकीमध्ये दुरानी यांनी अपक्ष पाथरी विधानसभा मतदारसंघातून निवडणूक लढवली आणि त्यांना पराभवाचा सामना करावा लागला.
