Rajendra Nikam
नातवाला पाहण्यासाठी महिला ऑस्ट्रेलिया येथे गेली होती. सकाळी पतीशी बोलून झाल्यानंतर भारतात परतणार असल्याचे तिने सांगितले. पत्नीला घेण्यासाठी पती कारने एअरपोर्टला जात होता. ड्रायव्हर दुसऱ्या गावाहून येणार असल्याने तिथपर्यंत ते स्वतः कार चालवत निघाले. मात्र गावाच्या दहा किलोमीटर अंतरावरच त्यांच्या गाडीचा अपघात झाला. त्यात पतीचा मृत्यू झाल्याची दुर्दैवी घटना 30 मे रोजी शहादा तालुक्यातील लांबोळानजीक घडली. सकाळी दहा वाजेच्या सुमारास हा अपघात झाला.
शहादा येथील व्यावसायिक हरजितसिंग जोधसिंग राजपाल (वय ५६) यांचा मुलगा राजा हा ऑस्ट्रेलियाला तर मुलगी स्नेहा ही न्यूझीलंड येथे वास्तव्यास आहे. काही दिवसांपूर्वी हरजीतसिंह राजपाल यांना नातू झाल्याने ऑस्ट्रेलिया येथे राहणाऱ्या राजाकडे त्यांची पत्नी गेली होती. अर्जित सिंह राजपाल व त्यांची पत्नी आणि कुटुंबियांशी रोज फोनवर संभाषण होत होते.30 मे रोजी सकाळी त्यांचे त्यांच्या पत्नीशी बोलणे झाले.पत्नी ऑस्ट्रेलियाहून परतणार होती. तिला घेण्यासाठी हरजितसिंग राजपाल हे सकाळी आपल्या कारने (क्रमांक एम.एच ३९, एजी ५७१७) शहादाहून प्रकाशा या गावी जात होते.कारचालक तळोदा येथे असल्याने तो तिकडून प्रकाशापर्यंत येणार होता. त्यामुळे राजपाल स्वतः कार चालवून तिथंपर्यंत जात होते.
त्यावेळी घरापासून दहा किलोमीटर अंतरावर असलेल्या लांबोळा जवळील टोलनाक्याजवळून १० चाकी डंपर (एमएच ४० पीसी १३६) शहादाकडे येत होता. दोन्ही भरधाव वाहने समोरासमोर धडकल्याने राजपाल हे कारमध्ये दाबले गेल्याने त्यांचा जागीच मृत्यू झाला.
धडक दिल्यानंतर कार उधळून बाजूच्या शेतात जाऊन पडली. यात कारचा चक्काचूर झाला आहे. अपघाताची माहिती मिळताच लांबोळा येथील नागरिक तसेच परिसरातील नागरिक त्या ठिकाणी आले.हरजितसिंग राजपाल यांना गाडीच्या बाहेर काढल्यानंतर रुग्णालयात घेऊन गेले असता त्यांना मृत घोषित केले. या अपघातामुळे पत्नीशी भेट अपूर्णच राहिली. आणि फोनवर बोललेले शेवटचेच राहिले. या घटनेनंतर परिसरात हळहळ व्यक्त करण्यात येत आहे.
