रक्ताच्या डागावरून लागला छडा, चार जण जेरबंद, ११ तोळ्यांचे दागिने हस्तगत.

चोरट्याच्या बोटाला लागलेल्या जखमेच्या रक्ताच्या डागावरून जवाहरनगर पोलिसांनी घरफोडी गुन्ह्याचा उलगडा केला आहे, यात ११ तोळे सोने हस्तगत करण्यात आले. अली सरवरसह चार जणांना अटक करण्यात आली असून सोहेल अद्याप फरार आहे.चोरट्याच्या बोटाला लागलेल्या जखमेच्या रक्ताच्या डागावरून जवाहरनगर पोलिसांनी घरफोडी गुन्ह्याचा छडा लावला. या प्रकरणी चार जणांना पोलिसांनी जेरबंद केले असून त्यांच्याकडून ११ तोळे सोन्याच्या दागिन्यांसह एकूण सव्वाअकरा लाखांचा मुद्देमाल हस्तगत करण्यात आला आहे. ही कारवाई २७ मार्च रोजी पहाटे करण्यात आली. अटक आरोपींना न्यायालयात हजर केले असता दोन एप्रिलपर्यंत पोलिस कोठडी सुनावण्यात आली.अली उर्फ निप्पल खान सत्तार खान ( वय २१, रा. हनुमाननगर, गारखेडा), अझर उर्फ लंबाट्या महंमद सरवर ( वय २२), अफरोज गुलाब शेख (वय २०), शाहीन अयाज अहेमद (वय २४, तिघे रा. काबरानगर, गारखेडा परिसर) अशी अटकेत असलेल्या आरोपींची नावे असून सोहेल महंमद सरवर (रा. काबारानगर) याचा पोलिस शोध आहेत. सोहेलवर खुनासह अन्य १५ गंभीर गुन्हे दाखल असल्याचे पोलिसांनी सांगितले.काबरानगरात राहणारे विजेंद्र खरात (वय ४६) हे कुटुंबासह क्रांतीनगर येथे नातेवाइकाच्या अंत्यविधीला गेले होते.

ही संधी साधून चोरट्यांनी विजेंद्र खरात यांच्यासह त्यांच्या काकाचे घर फोडून सुमारे दोन लाख २० हजारांच्या रोख रकमेसह २० तोळे सोन्याचे दागिने चोरून नेले होते. या प्रकरणात जवाहरनगर पोलिस ठाण्यात गुन्हा दाखल करण्यात आला.पोलिसांनी घटनास्थळी जाऊन पाहणी केली असता घरातील एका लोखंडी कपाटाला रक्ताचे डाग दिसले. फॉरेन्सिक टीमच्या मदतीने रक्ताचा डाग जतन करण्यात आला. कपाट फोडताना आरोपीला मार लागला असावा, असा निष्कर्ष काढून पोलिसांनी त्या दिशेने तपास सुरू केला. पोलिसांनी १५ संशयित गुन्हेगारांकडे चौकशी केली; तसेच त्यांच्या हाताला कुठे जखम आहे का हे बघितले. या दरम्यान अली उर्फ निप्पल याच्या उजव्या हाताच्या मधल्या बोटाला जखम झाली असल्याचे दिसून आली. त्यावरून संशय वाढल्याने पोलिसांनी त्याची कसून चौकशी केली; तसेच सीसीटीव्ही फुटेज आणि इतर माहिती घेतली असता त्याच्या दिवसभरातील हालचाली संशयास्पद दिसली.

त्या आधारे पोलिसांनी त्यास पकडले आणि त्याने साथीदारासह घरफोडी केल्याचे कबुली दिल्याचे पोलिसांनी सांगितले.त्याने दिलेल्या माहितीच्या आधारे पोलिसांनी अफरोज, अझर, शाईन या तिघांना पकडले. आरोपींकडून नऊ लाख २३ हजार रुपये किंमतीचे ११ तोळे सोन्याचे दागिने हस्तगत करण्यात आले आहे. ही कारवाई पोलिस आयुक्त प्रवीण पवार, पोलिस उपायुक्त प्रशांत स्वामी, सहायक पोलिस आयुक्त डॉ. रणजीत पाटील, पोलिस निरीक्षक अशोक शरमाळे यांच्या मागदर्शनाखाली पोलिस उपनिरीक्षक प्रशांत मुंढे, शिंगाने, मनोज उईके, सुभाष भुरके, शोन पवार, मारोती गोरे, मोफतलाल राठोड, ज्ञानेश्वर शेलार, श्रीकांत काळे, सविता राठोड, इंदुमती कदम आदींनी केली.अझर उर्फ लंबाट्या सरवर आणि सोहेल सरवर हे दोघे सराईत गुन्हेगार आहेत. अझरच्या विरोधात घरफोडी, चोरी, दरोडे, लूटमार सारखे नऊ गंभीर गुन्हे दाखल आहेत. सोहेल सरवरच्या विरोधात खून आणि इतर १५ गंभीर गुन्हे दाखल आहेत. अफरोज शेख हादेखील सराईत गुन्हेगार असून त्याच्या विरोधात सात गंभीर गुन्हे दाखल आहेत. सोहेल सरवर अद्याप फरारी असून, त्याचा शोध सुरू असल्याचे पोलिसांनी सांगितले.