आणखी एक मुस्कान; लग्नाच्या १५ व्या दिवशी पतीची हत्या, आहेरात आलेल्या पैशातून सुपारी, सारं काही बॉयफ्रेण्डसाठी.

उत्तर प्रदेशातील औरैया येथे मेरठसारखी घटना घडली आहे. येथे प्रियकरासाठी पुन्हा एका पतीचा बळी गेला आहे. पत्नीने लग्नाच्या १५ दिवसातच पतीची हत्या केली आहे.उत्तर प्रदेशातील औरैया येथे मेरठच्या सौरभ राजपूत हत्याकांड सारखी घटना समोर आली आहे. येथे एका पत्नीने लग्नाच्या १५ व्या दिवशी आपल्या पतीला संपवलं आहे. तिने सुपारी देऊन पतीच्या हत्येचा कट रचला. या घटनेने उत्तर प्रदेशात एकच खळबळ माजली आहे. हत्या झालेल्या पतीचं नाव दिलीप असल्याची माहिती आहे. तर औरैयाच्या या मुस्कानचं नाव प्रगती आहे. तिने आपल्या प्रियकरासोबत मिळून या हत्येचा कट रचला होता.प्रगतीचे गावातील अनुराग यादव नावाच्या तरुणावर प्रेम होते. जेव्हा घरच्यांना या नात्याची माहिती मिळाली तेव्हा त्यांनी तिचे लग्न दिलीपसोबत लावून दिले. प्रगतीची मोठी बहीण पारुलचा विवाह दिलीपचा मोठा भाऊ संजयशी झाला होता. त्यामुळे घरच्यांनी एकाच घरात आपली दुसरीही मुलगी देण्याचं ठरवलं. ५ मार्च २०१५ ला या दोघांचं लग्न झालं होतं.

पण, प्रगतीच्या मनात अनुराग होता. तिला हे लग्न मान्य नव्हतं. त्यामुळे तिने दिलीपच्या हत्येचा कट रचला. प्रगतीने तिचा प्रियकर अनुरागसोबत एक भयानक प्लॅन केला. प्रगतीला वाटले की दिलीप राहणार नाही तर ती अनुरागसोबत नवे आयुष्य जगू शकेल. तसेच, दिलीपचा पैसाही तिचा असेल. पण, तिची ही योजना यशस्वी झाली नाही.पोलिस अधीक्षक अभिजीत शंकर यांनी दिलेल्या माहितीनुसार, १९ मार्च २०२५ ला औरैया जिल्ह्यातील सहार पोलिस स्टेशन परिसरात पोलिसांना माहिती मिळाली की एक व्यक्ती गव्हाच्या शेतात गंभीर जखमी अवस्थेत पडून आहे. पोलिस घटनास्थळी पोहोचले तेव्हा त्यांना ती व्यक्ती रक्ताने माखलेली दिसली. त्यांना तात्काळ तिला रुग्णालयात नेले, मात्र तीन दिवस मृत्यूशी झुंज दिल्यानंतर २२ मार्च रोजी त्या व्यक्तीचा मृत्यू झाला. दिलीप यादव असे मृताचे नाव आहे. ही बातमी त्यांच्या कुटुंबीयांपर्यंत पोहोचताच शोककळा पसरली. दिलीपच्या भावाने सहार पोलिस ठाण्यात अज्ञातांविरुद्ध खुनाचा गुन्हा दाखल केला, पोलिसांनी या खून प्रकरणाची उकल करण्यास सुरुवात केली.पोलिसांनी ‘ऑपरेशन त्रिनेत्र’ अंतर्गत सीसीटीव्ही फुटेज तपासले असता जे सत्य समोर आले त्याने सारेच हादरले. काही लोक दिलीपला दुचाकीवर घेऊन जात असल्याचे व्हिडिओत दिसत होते. पोलिसांनी खबरींना सक्रिय केले आणि काही वेळातच रामजी नगरचे नाव समोर आले. २४ मार्चला पोलिसांनी रामजी नगरला अटक केली. चौकशीत त्याने जी कबुली दिली त्यावरून संपूर्ण प्रकरणाची उकल झाली.हा संपूर्ण कट प्रगती आणि तिचा प्रियकर अनुराग यादव यांनी रचल्याचे रामजी नागर यांनी सांगितले. लग्नाआधीही प्रगतीचे अनुरागवर प्रेम होते. प्रगतीने अनुरागला एक लाख रुपये दिले, जे अनुरागने रामजी नागरला दिले. त्याला दोन लाखांची सुपारी देण्यात आली होती. या प्रकरणी पोलिसांनी रामजी नागर, अनुराग यादव आणि प्रगती यादव या तिघांना अटक केली.