विकास कामांना निधी देणार नसाल तर राजीनामा देऊ का? ठाकरेंच्या शिलेदाराचा सभागृहात उद्विग्न सवाल.

परभणीच्या विविध प्रश्नांवरुन आमदार राहुल पाटील यांनी सभागृहात प्रश्न उपस्थित करत वेळोवेळो पाठपुरवठा करुनही प्रश्न सुटत नसतील तर राजीनामा द्यावा का? असा सवाल केला.परभणी शहरासाठी महत्त्वपूर्ण असलेली समांतर पाणीपुरवठा योजना तसेच अंडरग्राउंड ड्रेनेज योजना यासाठी मागील पाच वर्षापासून मी सभागृहामध्ये निधीसाठी पाठपुरावा करत आहे. मागील पाच वर्षात आम्ही मोर्चे काढले, धरणे आंदोलने केली. शासनाकडे वेळोवेळी पाठपुरावा करूनही जर प्रश्न सुटत नसतील तर मग आमदारकीचा राजीनामा द्यावा का असा उद्विग्न सवाल परभणी विधानसभा मतदारसंघाचे शिवसेना आमदार डॉ. राहुल पाटील यांनी सभागृहात उपस्थित केला.तर आमदार डॉ. राहुल पाटील हे आयत्या पिठावर रेघोट्या ओढतात, मागील दहा वर्षाच्या आमदारकीच्या काळात मतदारसंघातील कोणते ठोस प्रश्न सोडवले असा सवाल करत त्यांनी आपल्या आमदारकीचा राजीनामा द्यावा, सरकार परभणीकरांचे प्रश्न सोडवेल, असा पलटवार शिंदेंच्या शिवसेनेचे नेते आनंद भरोसे यांनी पत्रकार परिषद घेऊन केला आहे.सध्या राज्याचे अर्थसंकल्पीय अधिवेशन चालू आहे आणि या अर्थसंकल्पीय अधिवेशनामध्ये परभणी विधानसभा मतदारसंघाचे शिवसेना आमदार डॉ. राहुल पाटील यांनी परभणीच्या विकास कामासंदर्भात प्रश्न मांडले.

परभणी शहरासाठी समांतर पाणीपुरवठा योजना आणि अंडरग्राउंड ड्रेनेज योजना या दोन्ही योजना महत्त्वाच्या आहेत. त्याचबरोबर परभणी शहरातसाठी एक नाट्यगृह मंजूर झाले असून त्याचे कामही अर्धवट अवस्थेत आहेत. या तीनही योजनांसाठी लागणारा विकास निधी शासनाकडून मंजूर केला जात नाही.मागील पाच वर्षापासून आमदार राहुल पाटील यासाठी प्रयत्न करत आहेत. पण सरकारकडून त्याची दखल घेतली जात नाही. त्यामुळे त्यांनी काल सभागृहामध्ये जर मतदारसंघातले प्रश्नच सोडवणार नसतील, तर मग राजीनामा देऊ का असा उद्विग्न सवाल आमदार राहुल पाटील यांनी उपस्थित केला. मागील पाच वर्षापासून या योजनांसाठी निधी मंजूर करावा याची मागणी करत आहे, यासाठी आम्ही धरणे आंदोलने केली, मोर्चे काढले, सभागृहात आवाज उठवला, सर्वच स्तरावर प्रयत्न केले, तरी मात्र सरकारला जाग येत नसल्याचे आमदार राहुल पाटील म्हणाले.दुसरीकडे, शिवसेना आमदार राहुल पाटील यांनी सभागृहात केलेल्या वक्तव्याचे पडसाद आता परभणी विधानसभा मतदारसंघात दिसून आले. एकनाथ शिंदे यांचे शिलेदार आनंद भरोसे यांनी थेट पत्रकार परिषदेत घेतली. त्यांनी आमदार राहुल पाटील यांनी मागच्या दहा वर्षाच्या कारकिर्दीत त्यांच्या अपयशाचा पाढाच वाचून दाखवला.

२०१४ पासून आपर्यंत म्हणजे गेल्या दहा वर्षांपैकी साडेसात वर्ष सत्तेत असणाऱ्या आमदार राहुल पाटील यांनी कधी कोणता निधी आणला, कधी कोणते ठोस प्रश्न सोडवले, कधी कोणत्या प्रश्नासाठी सरकार दरबारी प्रयत्न केला, अन निधी खेचून आणला याचे त्यांनी स्पष्टीकरण द्यावे. केवळ आयत्या पिठावर रेघोट्या मारण्याचे काम आमदार राहुल पाटील करत आहेत असाही टोला त्यांनी लगावला. भूमिगत गटार योजना असो की समांतर पाणीपुरवठा योजना या दोन्ही योजनांसाठी निधी मंजूर होणार आहे आणि त्यामुळेच या कामाचे श्रेय लाटण्यासाठी आमदार राहुल पाटील सभागृहात केविलवाना प्रयत्न करणार असल्याचेही ते म्हणाले.एकंदरीतच परभणी विधानसभा मतदारसंघातील विकास कामांच्या निधीवरून मात्र शिवसेना विरुद्ध शिवसेना असा सामना रंगताना दिसून येत आहे. नुकत्याच झालेल्या विधानसभा निवडणुकीत शिवसेना उबाठा गटाकडून आमदार राहुल पाटील तर त्यांच्या विरोधात शिंदेंचे शिलेदार आनंद भरोसे यांनी निवडणूक लढवली होती. परभणी विधानसभा मतदारसंघातील जनतेने उद्धव ठाकरे यांच्याच शिवसेनेच्या शिलेदाराला म्हणजेच आमदार राहुल पाटलांना निवडून दिले. विधानसभा निवडणुकीत सुरू झालेला शिवसेना विरुद्ध शिवसेना असा संघर्ष आता परभणीच्या विकास कामावरूनही सुरू झाला असल्याचे दिसून येत आहे.