अडचणीच्या काळात साथ सोडू नका, उद्धव साहेब तुमची आठवण काढतायत, बड्या नेत्याला भावनिक साद अन्…

 एकीकडे ठाकरे गटाला धक्क्यावर धक्के बसत असताना माजी आमदाराला थांबवण्यात पक्षाला यश येते का, पाहणं महत्त्वाचं आहे.अडचणीच्या काळात पक्ष सोडू नका, पक्षाचं काम जोमाने जरा, उद्धव साहेब तुमची आठवण काढत आहेत, असा निरोप पुण्यातील शिवसेनेचे माजी आमदार महादेव बाबर यांना पोहोचवण्यात आला. शिवसेना (उद्धव बाळासाहेब ठाकरे) पक्षाचे प्रमुख उद्धव ठाकरे यांनी माजी खासदार विनायक राऊत यांच्यामार्फत बाबरांना निरोप पाठवला. विनायक राऊत यांनी महादेव बाबर यांना कॉल करुन पक्ष न सोडण्याची विनंती केल्याची माहिती आहे. एकीकडे ठाकरे गटाला धक्क्यावर धक्के बसत असताना माजी आमदाराला थांबवण्यात पक्षाला यश येते का, पाहणं महत्त्वाचं आहे.

अडचणीच्या काळात पक्ष सोडू नका, पक्षाच काम जोमाने जरा, उद्धव साहेब तुमची आठवण काढत आहेत, असं विनायक राऊत यांनी महादेव बाबर यांना फोनवर सांगितलं. लवकरच उद्धव ठाकरे आणि महादेव बाबर यांची भेट होणार आहे.महादेव बाबर उपमुख्यमंत्री एकनाथ शिंदे यांच्या नेतृत्वातील शिवसेना पक्षात जाणार असल्याच्या चर्चा होत्या, मात्र सध्या महादेव बाबर हे ठाकरे गटातच आहेत. कोकणातून सुरु झालेलं शिवसेनेचं ऑपरेशन टायगर थोपवण्यासाठी ठाकरेंनी कोकणी एक्का बाहेर काढल्याचे दिसते.सामंतांच्या मिशन टायगरला थोपवण्यासाठी ठाकरेंनी आपला कोकणातील हुकमी एक्का बाहेर काढला. नाराज नेत्यांना थांबवण्याचे मिशन ठाकरेंनी विनायक राऊत यांच्यावर सोपवले आहे. नाराज महादेव बाबर यांना थांबवण्यासाठी आता विनायक राऊत मैदानात उतरले असून राऊत यांनी बाबरांना फोन करून पक्षात जोमाने काम करा असं सांगितलं आहे.दुसरीकडे, विधानसभा निवडणुकीच्या तोंडावर भाजपला रामराम ठोकून ठाकरे गटात प्रवेश करणारे डॉ. दिनेश परदेशी यांनी मोठा निर्णय घेतला आहे. परदेशींनी ठाकरे गटाला ‘जय महाराष्ट्र’ करत भाजपमध्ये घरवापसी करण्याचं ठरवलं आहे. वैजापूर विधानसभा मतदारसंघातून निवडणूक लढलेल्या परदेशींना पराभवाचा धक्का बसला होता. त्यानंतर त्यांनी परतीची वाट पकडल्याचे दिसते. परदेशी बुधवारी भाजप प्रवेश करणार असल्याची माहिती आहे.