वाद अन् १०वीच्या विद्यार्थ्याने मित्राच्या छातीत बुक्की मारली, जागीच मृत्यू; कुटुंबाचा आक्रोश.

वर्गात वाद सुरु असताना झालेल्या मारामारीत एका विद्यार्थ्याने दुसऱ्याच्या छातीत बुक्की मारली. यामुळे त्या विद्यार्थ्याचा मृत्यू झाल्याची घटना घडली आहे.शाळेत एका विद्यार्थ्याने दुसऱ्या विद्यार्थ्याला बेदम मारहाण करत त्याची हत्या केली आहे. पश्चिम बंगालमधील हुगळी येथील जिल्हा शाळेत ही धक्कादायक घटना घडली आहे. या घटनेची माहिती मिळताच पोलिसांनी घटनास्थळ गाठून मृतदेह ताब्यात घेत शवविच्छेदनासाठी पाठवला आहे. पोलिसांनी याप्रकरणी अल्पवयीन आरोपीला अटक केली आहे.लेकाच्या अशा अचानक झालेल्या मृत्यूने त्याच्या घरच्यांना मोठा धक्का बसला आहे. मृत विद्यार्थ्याचे वडील गणेश जालान म्हणाले की, विद्यार्थी शिक्षकांसमोर कसे भांडू शकतात? शाळेत अभ्यास नाही होत का? माझी मागणी आहे की, माझ्या मुलाच्या मृत्यूला जबाबदार असलेल्या व्यक्तीला शिक्षा व्हावी.

हे दोन्ही विद्यार्थी हुगळीच्या चंपदानी येथील आर्य विद्यापीठ शाळेत शिकत होते. एक दिवस दोघांमध्ये काही कारणावरून वाद झाला आणि त्याचं रुपांतर इतक्या भयंकर गुन्ह्यात होईल याचा कोणी विचारही केला नसेल. याप्रकरणी मिळालेल्या माहितीनुसार, वर्ग सुरू होता. दरम्यान, दुपारी एक वाजण्याच्या सुमारास दहावीच्या विद्यार्थ्यांमध्ये हाणामारी सुरू झाली. त्याचवेळी अभिनव नावाच्या विद्यार्थ्याच्या छातीवर त्याच्या वर्गमित्राने जोरदार बुक्की मारली. बुक्की लागताच अभिनव बेशुद्ध होऊन खाली कोसळला.तर, मृत विद्यार्थ्याच्या आईने सांगितले की, सहा महिन्यांपूर्वी त्यांच्या मुलीचाही हृदयविकाराच्या झटक्याने मृत्यू झाला होता. आता मी माझा मुलगाही गमावला आहे.पोलिसांना या प्रकरणाची माहिती मिळताच घटनास्थळ गाठून विद्यार्थ्याचा मृतदेह ताब्यात घेऊन पोस्टमार्टमसाठी पाठवला. पोलिसांनी पीडितेच्या कुटुंबीयांच्या तक्रारीवरून एफआयआर नोंदवून तपास सुरू केल्याचे सांगितले. आरोपी विद्यार्थ्याला अटक करून हाणामारीच्या कारणाबाबत चौकशी सुरू केली आहे. शाळेच्या मुख्याध्यापकांनी सांगितले की, घटनेच्या वेळी ते शाळेत नव्हते. माध्यमिक परीक्षेसाठी दुसऱ्या शाळेत गेले होते.