माजी आमदार हर्षवर्धन जाधव पोलिसांच्या ताब्यात, काय आहे प्रकरण?

माजी आमदार हर्षवर्धन जाधव यांना नागपूर पोलिसांनी ताब्यात घेतले आहे. न्यायालयाच्या आदेशानंतर ही कारवाई केली आहे. सन २०१४ साली नागपूर विमानतळावर शिवसेना पक्षप्रमुख उद्धव ठाकरे यांच्या शासकीय स्वीय सहाय्यकाला त्यांनी शिविगाळ करत मारहाण केली होती. त्यामुळे या प्रकरणी त्यांच्यावर सोनेगाव पोलिस ठाण्यात गुन्हा दाखल करण्यात आला होता. सरकारी कामात अडथळा आणण्याच्या प्रकरणावरुन कलम 353 अंतर्गत गुन्हा दाखल केला होता. या प्रकरणी न्यायालयात दोषारोपत्र दाखल झाले होते.हर्षवर्धन जाधव अनेक वॉरंट निघूनही न्यायालयात हजर होत नव्हते.त्यामुळे न्यायालयाचे निर्देशानुसार त्यांच्या विरोधात नॉन बेलेबल वॉरंट काढण्यात आले होते. आज ते नागपूरात न्यायालयात उपस्थित झाल्यावर नागपूर पोलिसांना न्यायालयाने अटक करण्याचे निर्देश दिले. अटक करुन त्यांना मध्यवर्ती कारागृहात रवानगी करण्याचे आदेश पोलिसांना दिले.हर्षवर्धन जाधव यांना ताब्यात घेतल्यानंतर वैद्यकीय तपासणी करण्यासाठी मेयो रुग्णालयात नेण्यात आले. त्यावेळी यांनी छातीत दुखत असल्याची तक्रार केली. त्यामुळे त्यांना पुढील 24 तास डॉक्टरांच्या देखरेखे खाली ठेवण्यात येणार आहे. उपचारानंतर जाधव यांनी रितसर अटक करण्यात येणार आहे. रुग्णालयात सोनेगाव पोलीस लक्ष ठेवून असणार आहे.