आई, मुलगा, सून आणि नातू… एकाच कुटुंबातील चौघं मृतावस्थेत आढळले, एका चिठ्ठीमुळे खळबळ.

कर्नाटकातील म्हैसूर येथील एका घरात सोमवारी आई, मुलगा, सून आणि नातू असे चौघे जण मृतावस्थेत आढळले. एकाच कुटुंबातील चौघा जणांचे मृतदेह सापडल्याने एकच खळबळ उडाली आहे. मुलाने कुटुंबाची सामूहिक हत्या करुन आत्महत्या केल्याचा प्राथमिक संशय पोलिसांनी व्यक्त केला आहे. मृतांमध्ये एका अल्पवयीन मुलाचाही समावेश आहे. पोलिसांना सुसाईड नोट सापडली आहे, मात्र मृत्यूचं कारण अद्याप स्पष्ट नाही.चेतन (४५), त्याची पत्नी रुपाली (४३), त्यांचा १५ वर्षीय मुलगा आणि चेतनची आई प्रियंवदा (६२) अशी मृतांची नावे आहेत. चेतन हा एक व्यापारी होता. तो त्याच्या कुटुंबासह म्हैसूर येथील विश्वेश्वरैया नगरमध्ये राहत होता. त्याने लिहिलेली सुसाईड नोट पोलिसांना सापडली आहे.

म्हैसूर शहर पोलिस आयुक्त सीमा लाटकर यांनी डीसीपी (गुन्हे आणि वाहतूक) एस जान्हवी यांच्यासोबत घटनास्थळी भेट दिली. त्यांनी सांगितले की, मयत कुटुंब दोन फ्लॅटमध्ये राहत होते. एका फ्लॅटमध्ये चेतनचे कुटुंब आणि दुसऱ्या फ्लॅटमध्ये त्याची आई राहत होती. पोलिसांनी सांगितले की, चेतन हा मेकॅनिकल इंजिनिअर होता आणि तो मध्य पूर्व देशात काम करत होता आणि २०१९ मध्ये भारतात परतला.”आम्हाला संशय आहे की चेतनने त्याच्या कुटुंबातील सदस्यांना विष पाजले आणि नंतर आत्महत्या केली. मृत्यूचे कारण अद्याप स्पष्ट झालेले नाही. रविवारी संपूर्ण कुटुंब गोरुर येथील एका मंदिरात गेले आणि परत येताना ते म्हैसूर येथील रुपाली यांच्या घरी गेले. घरी परतण्यापूर्वी त्यांनी जेवण केले” असे एका पोलिस अधिकाऱ्याने सांगितले. विद्यारण्यपुरम पोलिसांनी गुन्हा दाखल केला आहे.दुसरीकडे, जालना जिल्ह्यात अंबड शहरातील पठाण मोहल्ला भागात राहणाऱ्या कलीम शेख खाजा शेख (वय ३०) या तरुणाचा शनिवारी रात्री चाकूने वार करून निर्घृणपणे खून करण्यात आला. रात्री साडेदहाच्या सुमारास कलीम शेख यास पठाण मोहल्ल्यातील लाहोटी यांच्या घरासमोर गाठून सरफराज फेरोज शेख व अन्य तीन जणांनी त्याच्यावर धारदार चाकूने वार केले. गंभीर जखमी झालेल्या कलीमला जालना येथे जिल्हा सरकारी रुग्णालयात हलविण्यात आले होते,उपचार सुरू असताना तो मरण पावला. या प्रकरणी अंबड पोलीस ठाण्यात सरफराज शेख यांच्यासह चौघाविरुद्ध गुन्हा दाखल करण्यात आला आहे. तपास अंबड पोलिस ठाण्याचे प्रभारी अधिकारी आयपीएस सिद्धार्थ बारवाल करीत आहेत.