Rajendra Nikam
लाखो खातेदार असलेल्या न्यू इंडिया को-ऑपरेटिव्ह बँकेत १२२ कोटी रुपयांचा गैरव्यवहार केल्याप्रकरणी बँकेचा माजी महाव्यवस्थापक हितेश मेहता याच्या अटकेनंतर आर्थिक गुन्हे शाखेने आणखी एका आरोपीच्या मुसक्या आवळल्या आहेत.लाखो खातेदार असलेल्या न्यू इंडिया को-ऑपरेटिव्ह बँकेत १२२ कोटी रुपयांचा गैरव्यवहार केल्याप्रकरणी बँकेचा माजी महाव्यवस्थापक हितेश मेहता याच्या अटकेनंतर आर्थिक गुन्हे शाखेने आणखी एका आरोपीच्या मुसक्या आवळल्या आहेत. धर्मेश पौन असे त्याचे नाव असून, तो बांधकाम व्यवसायिक आहे. हितेशने बँकेतून काढलेल्या रकमेपैकी सुमारे ७० कोटी रुपये धर्मेशला दिल्याचे समोर आले आहे. या दोन्ही आरोपींना न्यायालयाने २१ फेब्रुवारीपर्यंत पोलिस कोठडी सुनावली आहे.
न्यू इंडिया को-ऑपरेटिव्ह बँकेच्या महाव्यवस्थापक व अकाउंट्स विभागाचे प्रमुखपद हितेश मेहताकडे होते. त्याने पदाचा गैरवापर करत अन्य साथीदारांच्या मदतीने बँकेच्या प्रभादेवी आणि गोरेगाव कार्यालयातील तिजोरीत ठेवलेल्या १२२ कोटी रुपयांचा अपहार केला, असा आरोप करीत बँकेतील आर्थिक अनियमिततेबाबत मुख्य कार्यकारी अधिकारी देवर्षी घोष यांनी दिलेल्या तक्रारीवरून गुन्हा दाखल करण्यात आला आहे. सर्वसामान्य खातेदारांचे कोट्यवधी रुपये अडकले असल्याने या प्रकरणाचा तपास आर्थिक गुन्हे शाखेकडे देण्यात आला आहे. तपास पथकाने मेहताला शनिवारी अटक केल्यानंतर त्याच्या चौकशीमध्ये पौनचे नाव पुढे आले. त्यानंतर कांदिवली येथे वास्तव्यास असलेल्या पौनच्याही मुसक्या पोलिसांनी आवळल्या.
