श्वानामुळे ५६ वर्षीय इसमाची हत्या उघड; सहा तास होता मृतदेहाजवळ बसून, कळमेश्वरमधील घटना.

मृतदेहाजवळ तब्बल सहा तास तळ ठोकून असलेल्या श्वानामुळे त्याच्या मृतदेहाचा नातेवाइकांना शोध घेता आला. ही घटना कळमेश्वर पोलिस ठाण्याच्या हद्दीतील खुर्सापार जंगलात सोमवारी रात्री ११ वाजताच्या सुमारास उघडकीस आली. दगडाने डोक्यावर वार करून जंगलात ५६ वर्षीय इसमाचा खून करण्यात आला. मृतदेहाजवळ तब्बल सहा तास तळ ठोकून असलेल्या श्वानामुळे त्याच्या मृतदेहाचा नातेवाइकांना शोध घेता आला. ही घटना कळमेश्वर पोलिस ठाण्याच्या हद्दीतील खुर्सापार जंगलात सोमवारी रात्री ११ वाजताच्या सुमारास उघडकीस आली.देविदास रामाजी चचाने (वय ५६, रा. वॉर्ड क्रमांक-२, पिल्कापार, कळमेश्वर), असे मृताचे नाव आहे. देविदास हे अजारी जनावरांना बरे करण्यासाठी आयुर्वेदिक औषध तयार करून त्याची विक्री करायचे. प्राप्त माहितीनुसार, देविदास यांना जसवंत व दर्शन ही दोन मुले आहेत. जसवंत हा शेतीचे काम करतो तर दर्शन सोलर कंपनीत कार्यरत आहे. चचाने कुटुंबाकडे २० म्हशी असून त्यांचा दूध विक्रीचाही व्यवसाय आहे. देवीदास हे नेहमी सकाळी १० वाजता खुर्सापार जंगलातील तलावाजवळ म्हशी चारायला घेऊन जायचे व सायंकाळी ५.३० वाजतापर्यंत घरी परत यायचे.

सोमवारी नेहमीप्रमाणे देविदास हे सकाळी १० वाजताच्या सुमारास म्हशी चरण्यासाठी घेऊन गेले. मात्र, सायंकाळी ५ वाजतानंतरही देविदास घरी परतले नाही. त्यामुळे जसवंत याने त्यांच्या मोबाइलवर संपर्क साधला असता देविदास यांनी प्रतिसाद दिला नाही. जसवंत हा मोटारसायकल घेऊन खुर्सापार जंगलात गेला. त्याला तलावाजवळ ओळखीचे गजेंद्र राऊत दिसले. जसवंत याने त्यांना वडील देविदास यांच्याबाबत विचारणा केली असता, ‘म्हशी गावाकडे परत जाताना दिसल्या. मात्र, सोबत तुझे बाबा नव्हते’, असे गजेंद्र यांनी जसवंत याला सांगितले.त्यानंतर जसवंत व त्याच्या नातेवाइकांनी देविदास यांचा शोध सुरू केला. रात्री ११ वाजताच्या सुमारास जंगल परिसरात जसवंत याला पाळीव श्वान दिसले. जसवंतला बघताच श्वान त्याच्याजवळ येत भुंकू लागला. त्यानंतर श्वानाने तोंडाने जसवंतचे शर्ट पकडले. परत तो भुंकायला लागला. शर्ट सोडल्यानंतर श्वान सुमारे २ किमी अंतरापर्यंत गेला. त्याच्या मागे जसवंत व नातेवाइक जंगलात गेले असता देविदास हे बेशुद्ध अवस्थेत निचचित पडले होते. जसवंत याने त्यांना जागे करण्याचा प्रयत्न केला मात्र ते जागे झाले नाहीत. जसवंतने देविदास यांचे डोके वर उचलले असता त्यांच्या डोक्याला मागील बाजूने मोठी जखमी होती. त्यातून रक्त निघत होते. जड वस्तूने त्यांच्या डोक्यावर वार करण्यात आल्याचे त्यांना दिसले.दरम्यान एकाने कळमेश्वर पोलिसांना घटनेची माहिती दिली. माहिती मिळताच पोलिसांचा ताफा जंगलातील घटनास्थळी पोहोचला. पंचनामा करून मृतदेह उत्तरीय तपासणीसाठी हॉस्पिटलकडे रवाना केला. पोलिसांनी खुनाचा गुन्हा दाखल करून मारेकऱ्याचा शोध सुरू केला आहे. देविदास यांची हत्या कोणी व का केली, याचा शोध पोलिस घेत आहेत.