सुवर्णा वाजे मृत्यूपूर्वी कुणाला भेटल्या? नाशिकच्या डॉक्टरला गाडीत जाळलं, तीन वर्षांनी पती निघाला…

ज्या दिवशी डॉ. वाजे यांची हत्या झाली, त्या दिवशी त्या एका व्यक्तीला भेटल्या होत्या. ती व्यक्ती नेमकी कोण, त्यांच्या भेटीत नेमके काय झाले, या संदर्भात पोलिसांना ठोस पुरावे सादर करता आले नाहीत.महापालिकेच्या वैद्यकीय अधिकारी डॉ. सुवर्णा वाजे यांच्या मृत्यूप्रकरणी संशयित पती डॉ. संदीप वाजे, यशवंत म्हस्के यांची निर्दोष मुक्तता झाली असली तरी जिल्हा सत्र न्यायालयाचे न्या. रुपेश राठी यांनी या गुन्ह्याच्या तपासाबाबत पोलिसांवर ताशेरे ओढले आहेत.
जिल्हा सत्र न्यायालयाचे न्या. रुपेश राठी यांच्यासमोर खटला चालून त्यावर सोमवारी (ता. १०) सुनावणी झाली. यात न्यायालयाने मुख्य संशयित डॉ. संदीप वाजे, यशवंत म्हस्के यांची निर्दोष मुक्तता केली आहे. हा निकाल देताना मात्र न्यायालयाने पोलिसांच्या तपासावर गंभीर स्वरूपाचे ताशेरे ओढले आहेत.

दरम्यान, ज्या दिवशी डॉ. वाजे यांची हत्या झाली, त्या दिवशी त्या एका व्यक्तीला भेटल्या होत्या. ती व्यक्ती नेमकी कोण, त्यांच्या भेटीत नेमके काय झाले, या संदर्भात पोलिसांना ठोस पुरावे सादर करता आले नाहीत. या संदर्भात डॉ. संदीप वाजे यांच्या पक्षातर्फे ॲड. राहुल कासलीवाल आणि स्नेहल पाटील यांनी जोरदार युक्तिवाद केला. म्हस्के यांच्या वतीने ॲड. मंदार भानोसे यांनी बाजू मांडली.नाशिक महापालिकेच्या बेपत्ता वैद्यकीय अधिकारी डॉ. सुवर्णा वाजे यांच्या मृत्यूचे गूढ दहा दिवसांनी उकलले होते. कट रचून हा खून केल्याचे पोलिस तपासात निष्पन्न झाले. वाडीवऱ्हे परिसरात २६ जानेवारी २०२२ रोजी सकाळी एका कारमध्ये सुवर्णा वाजे यांचा जळालेल्या अवस्थेत मृतदेह आढळून आला होता. कार खाक झाली होती. मीठ व रसायन यांचा वापर करून वाजे यांना पूर्णतः जाळले होते.डॉ. सुवर्णा वाजे या महापालिकेच्या श्री स्वामी समर्थ रुग्णालयात वैद्यकीय अधिकारी म्हणून कार्यरत होत्या. मंगळवार २५ जानेवारी २०२२ रोजी त्यांनी नेहमीप्रमाणे रुग्णालयात आपली ड्युटी बजावली. त्यानंतर त्या घरी जाण्यास निघाल्या, मात्र घरी पोहचल्याच नाही. सुवर्णांचा कुठेच पत्ता लागत नव्हता, म्हणून पती संदिप वाजेने स्थानिक पोलीस ठाण्यात पत्नी बेपत्ता असल्याची तक्रार दाखल केली होती. यानंतर दुसऱ्या दिवशी नाशिक-मुंबई महामार्गावर मिल्ट्री गेटसमोर त्यांची गाडी जळालेल्या अवस्थेत सापडली. या गाडीत जळालेली हाडे होती. ही हाडे सुवर्णा वाजेंचीच असल्याचे निष्पन्न झाल्यानंतर त्यांच्या मृत्यूचे गूढ वाढले होते.