कामावर जाताना अपघात, भरधाव वेगात डंपरने तीन मजुरांना दुचाकीसह फरफटत नेलं, एकाचा जागीच मृत्यू.

धुळ्यात भरधाव वेगात असलेल्या वाहतूक करणाऱ्या डंपरने एक दुचाकीला जोरदार धडक दिली. इतकंच नाही तर या डंपरने मजुरांना दुचाकीसह फरफटत नेलं. यामध्ये एकाचा जागीच मृत्यू झाला आहे.धुळे तालुक्यातील वरखेडी-आर्णी रस्त्यावर वरखेडी शिवारात भीषण अपघात झाल्याची माहिती आहे. धुळे-नरडाणा रेल्वे मार्गाच्या कामासाठी वापरला जाणारा डंपर आणि दुचाकी यांच्यात जोरदार धडक होऊन हा भीषण अपघात झाला. या अपघातात एका टाइल्स फिटिंग मजुराचा जागीच मृत्यू झाला आहे. तर, अन्य दोन जण गंभीर जखमी झाल्याची माहिती आहे.

याप्रकरणी मिळालेल्या अधिक माहितीनुसार, धुळे-नरडाणा रेल्वे मार्गाचे काम सुरू आहे. यासाठी या भागात मोठ्या प्रमाणात डंपर वाहतूक सुरू आहे. आज मंगळवारी (११ फेब्रुवारी) सकाळी वरखेडी गावातून आंबोडे येथे कामावर जाणाऱ्या तीन मजुरांच्या दुचाकीला याच वाहतूक करणाऱ्या डंपरने भरधाव वेगाने धडक दिली. अपघात इतका भीषण होता की यामध्ये दुचाकीचा पूर्णपणे चक्काचूर झाला होता. प्रत्यक्षदर्शींच्या मते, डंपरने दुचाकीला अक्षरशः फरफटत दुरपर्यंत नेलं आणि नंतर तो डंपर थांबला. डंपरने फरफटत नेल्याने दुचाकीवरील तिघांनाही मोठी दुखापत झाली. यामध्ये एका मजुराचा जागीच मृत्यू झाला तर दोघे गंभीर जखमी झाले आहेत.या दुर्घटनेत अनिल कुंभार (टाइल्स फिटिंग मजूर) यांचा जागीच मृत्यू झाला. तसेच, सोपान भरत पाटील आणि करण शामराव भिल हे गंभीर जखमी झाले असून त्यांना तातडीने जिल्हा रुग्णालयात दाखल करण्यात आले आहे.या घटनेची माहिती मिळताच धुळे तालुका पोलिसांनी त्वरित घटनास्थळी धाव घेतली आणि अपघातातील डंपर जप्त केला आहे. या अपघाताचे नेमके कारण शोधण्यासाठी सध्या तपास सुरू असून, चालकाच्या हलगर्जीपणामुळे हा अपघात झाल्याचा प्राथमिक अंदाज व्यक्त केला जात आहे.धुळे-मनमाड-इंदूर रेल्वे मार्गाच्या कामासाठी मोठ्या प्रमाणावर अवजड वाहतूक सुरू आहे. मात्र, या ठिकाणी सुरक्षेच्या उपाययोजना पुरेशा प्रमाणात केल्या जात नाहीत का, असा प्रश्न उपस्थित झाला आहे. प्रशासनाने यावर लवकरात लवकर उपाययोजना कराव्यात, अशी मागणी स्थानिक नागरिक व मजुरांनी केली आहे.