उद्धवजी येईपर्यंत तरी थांबा ना, ठाकरे गटाच्या नेत्यांची ‘नाराजां’ना विनवणी; पण दोघा शिलेदारांची एक्झिट ठरली.

विधानसभा निवडणुकीचा निकाल लागल्यानंतर एकीकडे भाजप, आणि आता दुसरीकडून एकनाथ शिंदेंची सेनाही ठाकरेंच्या पक्षांमध्ये नाराज असलेल्या नेत्यांना आपल्याकडे खेचण्याचा प्रयत्न करताना दिसत आहे. शिंदेंच्या शिवसेनेने तर ‘मिशन टायगर’ राबवत ठाकरेंना अनेक धक्के देण्यास सुरुवात केली आहे.काही दिवसांपूर्वी पुण्यातील शेकडो शिवसैनिकांनी शिंदेंच्या पक्षात प्रवेश केला. आता नाराजांना रोखण्यात ठाकरेंचे स्थानिक नेते कमी पडत असल्याने ही गळती रोखण्यासाठी थेट शिवसेना उद्धव बाळासाहेब ठाकरे पक्षाचे पक्षप्रमुख उद्धव ठाकरे मैदानात उतरणार असल्याचं बोललं जात आहे.आधीच तुटपुंजी असलेली पुण्यातील ठाकरे सेनेची ताकद आणखी कमी होत असल्याने आगामी महापालिका निवडणुकीसाठी ही धोक्याची घंटा होऊ शकते. त्यामुळे स्थानिक पदाधिकारी या नाराजांना रोखण्याचा प्रयत्न करत आहेत. मात्र नाराज नेत्यांची नाराजी दूर करण्यात कुठेतरी स्थानिक पदाधिकारी कमी पडत असल्याने नुकतंच काही स्थानिक नेत्यांनी उद्धव ठाकरे यांची भेट घेत पुण्यामध्ये येण्याची विनंती केली होती. त्यानुसार आता फेब्रुवारीच्या शेवटच्या आठवड्यात उद्धव ठाकरे हे पुण्यामध्ये येऊन शाखाप्रमुख यांना भेटणार आहेत.