PMP बसचा आरसा तोडला, चालकाने बाईकवरुन पाठलाग करत अडवलं, पण शेवट भीषण झाला.

वानवडीतील संविधान चौक येथे शुक्रवारी सकाळी नऊच्या सुमारास पीएमपी बस आणि अपघातग्रस्त डंपरचा किरकोळ अपघात झाला. डंपर घासल्याने बसचा आरसा तुटला. त्यावरून देशमुख आणि बाभूळकर यांच्यात वाद झाला.कचरा वाहतूक करणाऱ्या महापालिकेच्या डंपरने पीएमपी चालकाला चिरडल्याचा धक्कादायक प्रकार वानवडीत घडला. बसचा आरसा तोडून पळून जाण्याचा प्रयत्न करणाऱ्या डंपरचालकाला पीएमपी चालकाने सुमारे अर्धा किलोमीटर अंतरचा पाठलाग करून थांबवले. डंपरचालकाने गाडी पुढे नेण्याचा प्रयत्न केला असता, धक्का लागून पीएमपीचा चालक खाली पडला. डंपरचे चाक त्यांच्या अंगावरून गेले, त्यातच त्यांचा मृत्यू झाला. संजय मच्छिंद्र देशमुख ( वय ५० रा. काळेपडळ) असे मृत्युमुखी पडलेल्या चालकाचे नाव आहे.

ही घटना वानवडी सनग्रेस शाळेजवळ शुक्रवारी सकाळी नऊ वाजण्याच्या सुमारास घडली. या प्रकरणी महापालिकेच्या कचरा डंपर चालकाविरोधात गुन्हा दाखल करण्यात आला आहे. रजत किशोर बाभूळकर (वय २८) असे अटक केलेल्या डंपरचालकाचे नाव आहे. वानवडी पोलिस ठाण्याचे वरिष्ठ निरीक्षक सत्यजित आदमाने यांनी दिलेल्या माहितीनुसार, वानवडीतील संविधान चौक येथे शुक्रवारी सकाळी नऊच्या सुमारास पीएमपी बस आणि अपघातग्रस्त डंपरचा किरकोळ अपघात झाला. डंपर घासल्याने बसचा आरसा तुटला. त्यावरून देशमुख आणि बाभूळकर यांच्यात वाद झाला. त्यानंतर बाभूळकरने तेथून पळ काढला. अपघातात बसचा आरसा तुटल्याने देशमुख खाली उतरले आणि रस्त्याने जाणाऱ्या एका दुचाकीस्वाराच्या पाठीमागे बसून डंपरचा पाठलाग करू लागले. डंपर संविधान चौकातून पुढे गेला असता, देशमुख यांनी दुचाकीवरून पाठलाग करून त्याला सनग्रेस शाळेशेजारी थांबवले.देशमुख यांनी डंपरच्या नंबरचा फोटो काढला आणि ते मागील बाजूस जात असताना बाभूळकर याने डंपर सुरू केला आणि तेथून निघण्याचा प्रयत्न केला. त्या वेळी डंपरची दंशमुख यांना धडक बसली. ते खाली पडले. त्यानंतर डृंपरचे मागील चाक देशमुख यांच्या अंगावरून गेले. त्यात ते गंभीर जखमी झाले. नागरिकांनी तत्काळ त्यांना नजीकच्या रुग्णालयात दाखल केले. डॉक्टरांनी उपचारापूर्वीच त्यांचा मृत्यू झाल्याचे जाहीर केले.